Kvnde ich geloben die frowē min (Mit aufgelösten Abbreviaturen)

Kvnde ich geloben die frowen min
als ich entstan·
ze rehte wol
mit trúwen ich dc tete·
der ich mv̊s iemer mere sin·
gar vndertan·
min herze sol·
ir tragen wernde stete·

Ob ich si niht geloben kan·
so wissent doch·
das die dir sint·
von troie vntz vf die sone·
niender fvnden einen man·
der spreche noch·
[ie] sach ein kint·
dc lebt wol als schone

solde ich der frowen haben wal·
der leben stat·
vf hohen pris·
fúr miner frowen minne·
von Maggvn vnz ze portegal·
mins herzen rat·
wer ir amis·
von der ich lones sinne·

Was schate mir ein swacher nit·
ob mir dú schone gvnde·
dc ich ir diende zaller zit·
so vil ich danne kvnde·
was leiden mannes were dc·
der mir der selde erbvnde·
ob ich erwurbe ane ir has·
dc ich genade fvnde·

Es ist ein reiner sitte gv̊t·
an frowen dc·
si minnent ie·
gar ane strit·
mit stetem mv̊te stent in ir gebande·
dar vf so húget min hoher mv̊t·
wande ich vergas·
der gv̊ten nie·
ze keiner zit·
sit dem tage dc man si genande·

wil si mir des gelǒben niet·
dc ich ir bin·
vnd lange was·
gar vndertan·
ê ich si durh der ǒgen schin erkande·
vnd ich mich nie von ir geschiet·
vnd ie min sin·
ir tvgende las·
vf gv̊ten wan·
des setze ich ir dc herze min ze pfande·

dc mir nie wib so nahen kan·
vnd niemer sol·
swie verre ich si·
so wissent dc·
die mine sinne stent [al] in dem lande·
da ich ir kv́nde alrerst gewan·
mir tete wol·
mohte ich ir bi·
getweln [noch] bas·
mit steteclicher fůge vnd âne ir schande·

So nême ich fúr der vogelin sang·
der wol getânen minne·
swie doch der nahtegalen klang·
mir troͤsten mine sinne·
Vil dike so der min gedank·
mit sorgen lebt her inne·
si machet mir dc leben kranc·
mins herzen kv́niginne·

Sin enpflege mâsse·
von der strâsse·
mv̊s ich vf den smalen pfat·
da sprichet mir dú sorge mat·
so mv̊s ich froͤide miden·
vnd grossen kvmber liden·

ob ich mit stete·
gv̊t gerete·
niht an ir erwerben kan·
so heisse ich niht ein selig man·
si pfliget so vil der guͤte·
da von dc min gemvͤte·

dike singet·
vnd springet·
vf genedeklichen wan·
si ist so rehte wol getan·
dc nieman si ensehe·
wan der von schulden iehe·

der also were·
dc er swere·
wolde liden dur ein kint·
der were an beiden ougen blint·
wolde er si niht enminnen·
von allen sinen sinnen·

vf auentúre·
ich diene ir húre·
seht dar zv̊ wol zwenzig iar·
dc ich so grôs als vmbe ein har·
ir kvnde nie geniessen·
es mvͤse si verdriessen·
Ovidis der wise man·
do der von erst minnen pflag·
do kunte er vns den sinen ban·
ob si die naht ald[er] den tag·

dekeiner lib·
man alder wib·
die minne vnrehte pflegen·
der nider^{[WS 1]} schar·
die nemens war·
dc die vor kilchen legen·

der blůmen schin·
sol iemer sin·
von ir gewalt gescheiden·
div heide breit·
si vnbereit·
den kargen vnd den leiden·

Mir tv̊t der kumber niht zewe·
den ich mv̊s von in liden·
da von si tetens deste me·
bete ich sis gar vermiden·

min reht ist dc ich von in dulde·
kvmber vnd has·
die mir miner vrowen hulde·
erbvnden ane was·
wanden si dc ich ins gvlde·
si heten mich bas·
gar ane alle mine schvlde·
so nident si das·

ob mir geschehe·
das ich sehe·
ein wib der ich bin vndertan·
vnd ie was ane valschen wan·
dc si mich vmbe viengen·
der die dar vmbe hienge·

die gv̊ten lúten·
wendent trúten·
da es nieman scheiden sol·
dc kvnde ich vertragen wol·
ich bin in niht geminne·
swas ich da von gewinne·

Sorgen bv̊s·
tete ein grůs·
schone mir·
der von ir·
keme so·
were ich vro·
verre bas·
tete das·
danne ein wib·
minen lib·
hete wert·
bas gewert·
wer ich hie·
darnach ie·
min gedank·
ane wanc·
stete pflag·
vnz ich mag·
alder kan·
sele han·
so mv̊s dc herze min·
ir iemer stete sin·
vf den wan·
wande ich han·
mich gar an si verlan·

Nv nimt genv̊ge wnder·
dc ich so grossen kvmber klage·
vnd ie doch darvnder·
ein so hoh gemvͤte trage·
da han ich gv̊t gedinge·
dc si mir liebes ende gebe·
dar nach ich iemer ringe·
dc wissent al die wile ich lebe·

Anmerkungen (Wikisource)

1. Vorlage: niden.