Lieb dú haſt mich gar gewert

Lieb dú haſt mich gar gewert·
ſwaſ liebe ich han ze dir gegert·
deſ haſt du dich dur mich verwegen
des ſi min lib vnd al min leben
ze wider gelte dir^{[WS 1]} ergeben·
der ſolt du gar fúr eigen pflegē·
hier under ſiſt gemant an trúwe an ſtête·
der pflig gegen mir als du vil gerne ie tete·
ſo wil ǒch ich dú beide dir·
vs herzeklicher liebe gir·
mit voller wâge wid̾ wegen·

Lieb dir ſol nit weſē leit
ob ich din trúre vn̄ ſtetekeit·
gegen mir ze leiſten habe gemant·
das kumet vō miſſetrúwen niht·
das weis der in dú herzen ſicht·
mir iſt din můt din h̾ze erkant·
ſo rechte gantz ſo ueſt vn̄ ſo uermeſſen·
das dú nicht trúwe vn̄ ſtete macht vergeſſen·
das ich das weis ſo ſich̾lich·
das iſt ein ding das iemer mich
hin zů dir bindet vn̄ ie bant

Lieb ich weis dins lobes me·
vil lange wernd es dir beſte·
das hat din lib vn̄ ǒch din můt·
din lib hat ſchoͤne vn̄ gůte iugent·
din můt wiſheit vn̄ ganze tůgent·
ſus biſtu beident halb behůt·
waſ hulfe ein uber meſſig lob geſungen·
dis lob ſwie kurtze es ſi mit rede getwungē·
es iſt doch vollen wit vn̄ bꝛeit·
vn̄ hat da bi mâſſe vn̄ warheit·
das ſolt du han von mit vúr gůt·

Anmerkungen (Wikisource)

1. Vorlage: ir.