Lieb dú hast mich gar gewert

Lieb dú hast mich gar gewert·
swas liebe ich han ze dir gegert·
des hast du dich dur mich verwegen
des si min lib vnd al min leben
ze wider gelte dir^{[WS 1]} ergeben·
der solt du gar fúr eigen pflegen·
hier under sist gemant an trúwe an stête·
der pflig gegen mir als du vil gerne ie tete·
so wil ǒch ich dú beide dir·
vs herzeklicher liebe gir·
mit voller wâge wider wegen·

Lieb dir sol nit wesen leit
ob ich din trúre vnd stetekeit·
gegen mir ze leisten habe gemant·
das kumet von missetrúwen niht·
das weis der in dú herzen sicht·
mir ist din můt din herze erkant·
so rechte gantz so uest vnd so uermessen·
das dú nicht trúwe vnd stete macht vergessen·
das ich das weis so sicherlich·
das ist ein ding das iemer mich
hin zů dir bindet vnd ie bant

Lieb ich weis dins lobes me·
vil lange wernd es dir beste·
das hat din lib vnd ǒch din můt·
din lib hat schoͤne vnd gůte iugent·
din můt wisheit vnd ganze tůgent·
sus bistu beident halb behůt·
was hulfe ein uber messig lob gesungen·
dis lob swie kurtze es si mit rede getwungen·
es ist doch vollen wit vnd breit·
vnd hat da bi mâsse vnd warheit·
das solt du han von mit vúr gůt·

Anmerkungen (Wikisource)

1. Vorlage: ir.