Lob vō reinē wibe mag
[173v]
Lob vō reinē wibe mag·
mir trures vil benemē vn̄ froͤide gebē·
des ich ie ze ſingē pflag·
ſit dc ich erkande ir vil w̾deklicheſ lebē·
ich wil ir zehuldē
machē manig h̾ze vꝛo·
ſit ich wol vō ſchuldē
mag ir lop getúrē ho·
kvnde ich nach ir wirde dc·
niem̾ wurde wibe me geſpꝛochen bas·
Dvr die ich mines lobes bin·
allē gv̊tē wibē vil bereit·
der get vil kleine[WS 1] zeoꝛē in·
ſwc ich vō ir tvgende han geſeit·
got gebiete d̾ gv̊tē·
dc ſi mine klage v̾neme·
vn̄ d̾ hohgemv̊tē·
dc ir da bi mī lob gezeme·
ſeht ſo mag ich ſpꝛechē wol·
ſwc mā vō einē w̾dē wibe ſpꝛechē ſol·
Wie iſt dú welt alſo v̾zaget·
an allen erē dú bi erē ſtuͤnde wol·
ſw̾ vō ſchuldē nien enklaget·
d̾ enweis niht rehte wc er trvrē ſol·
wc mir leit v̾tribe·
wc mir hohgemvͤte gebe·
dc ich einē wibe·
ſvnd̾ mit gedankē lebe·
wā dur d̾ w̾lte gemeine ſitte·
ſo mvͤſt ich and̾s allē ſoꝛgen volge mitte·
Was iſt beſſer dāne eī wib·
dú mit zúhtē wibes gvͤte erzeigē wil·
wib dī mīneklicher lib·
vb̾miſſet al der w̾lte froͤiden zil·
wc ſich dir geliche·
dc iſt mir vúr war niht kvnt·
wā dc himelriche·
ſelig ſi dú ſvͤze ſtunt·
do gůt̾ wibe wart gedaht·
ſwie mich ir einú hab in ſendē kvmb̾ bꝛaht·
Anmerkungen (Wikisource)
- ↑ Vorlage: kleinen.