Lob von mangen zvngen (Mit aufgelösten Abbreviaturen)

Lob von mangen zvngen·
wart dem meigen húre gesvngen·
von dien voglin dvr den grvͤnen walt·
die hat nv betwngen·
vnd iemerlich verdrvngen·
rife sne dar zv̊ der winter kalt·
des vil manig herze trvric stat·
dar zv̊ trvret ǒch das mine·
nach dem froͤidebernden schine·
der von ir vil rotem mvnde gat·

Mir was froͤide entsprvngen·
leider nv ist mir niht gelvngen·
an der lieben dv́ min hat gewalt·
wêr min sank erklvngen·
ir so mvͤste ich wider ivngen·
svst bin ich in sorgen worden alt·
frowe minne gibt mir dinen rat·
alder ich lebe in sendem pine·
frowe vf die genade dine·
diene ich dir swies mir dar vmbe ergat·

Ich han mine stvnde·
vil gervngen nach dem mvnde·
der so lieplich ist dvrlúhtig rot·
das mir nie enkvnde·
werden heil mis herzen wnde·
da von lide ich sender sende not·
minne sich dv last mich trvrig gan·
trost der selden vbergvlde·
frowe gent mir iwer hvlde·
wan es mv̊s doch an iv eine stân·

Ob ir trost mir gvnde·
dc ein kvs die not enbvnde·
die dv́ herze liebú mir gebot·
vnd sich vnderwnde·
lieb vnd dar an niht erwnde·
so geschiede ich noch von sender not·
die ich von der herzelieben han·
gar ane alle mine schvlde·
frowe sende not ich dvlde·
nv dvr got was han ich iv getan·