Lob von mangen zvngen (Mit originalen Lettern)

Lob von mangen zvngen·
wart dem meigen húre geſvngen·
von dien voglin dvr den grvͤnen walt·
die hat nv betwngē·
vn̄ iemerlich verdꝛvngē·
rife ſne dar zv̊ der winter kalt·
des vil manig h̾ze trvric ſtat·
dar zv̊ trvret ǒch das mine·
nach dem froͤidebernden ſchine·
der von ir vil rotem mvnde gat·

Mir was froͤide entſpꝛvngen·
leider nv iſt mir niht gelvngen·
an der lieben dv́ min hat gewalt·
wêr min ſank erklvngē·
ir ſo mvͤſte ich wider ivngen·
ſvſt bin ich in ſoꝛgen woꝛden alt·
frowe mīne gibt mir dinen rat·
alder ich lebe in ſendem pine·
frowe vf die genade dine·
diene ich dir ſwieſ mir dar vmbe ergat·

Jch han mine ſtvnde·
vil gervngē nach dē mvnde·
der ſo lieplich iſt dvrlúhtig rot·
das mir nie enkvnde·
werden heil mis herzen wnde·
da von lide ich ſender ſende not·
minne ſich dv laſt mich trvrig gan·
troſt der ſelden vbergvlde·
frowe gent mir iw̾ hvlde·
wan es mv̊s doch an iv eine ſtân·

Ob ir troſt mir gvnde·
dc ein kvs die not enbvnde·
die dv́ h̾ze liebú mir gebot·
vn̄ ſich vnderwnde·
lieb vn̄ dar an niht erwnde·
ſo geſchiede ich noch von ſender not·
die ich von der herzelieben han·
gar ane alle mine ſchvlde·
frowe ſende not ich dvlde·
nv dvr got was han ich iv getan·