Lovp gras blůmen vogelsingen

Lovp gras blůmen vogelsingen·
vor dem walde vnd in den ǒwen·
vf der heide rosen rot·
die der meige vns kan bringen·
da mag man den rifen schǒwen·
doch klage ich ein ander not·
von der minnenklichen svͤssen·
dv́ mich lieplich solde grvͤssen·
minne dc solt dv mir buͤssen·
sit ich mich der lieben ie ze^{[WS 1]} dienste bot·

 Sit min sendes herze weinet·
nach der lieben die ich da meine·
we warvmbe tůt es das·
vnd ir herze ist vnvereinet
dc es nach dem min niht weine·
minne sich dc ist din has·
den ich sender siecher dvlde·
gar an alle mine schvlde·
minne hilf mir vmb ir hvlde·
dc si mich nah wibes gvͤte troͤste bas·

Solde ich sie vil minnekliche·
sehen als ich si zeinem male·
sach so wer min froͤide gros·
vnd were in selden riche·
wan das mich ir minnestrale·
in das sende herze schos·
dast^{[WS 2]} din vnverheilet wnde·
ob ir trost mir die verbvnde·
mit ir rosvarwen mvnde·
wer were an froͤiden danne min genos·

Ich wene nieman kvnne erdenken·
was man wnne bi den wiben·
vindet si gent hohen mv̊t·
swer den sorgen welle entwichen·
der sol stete an in beliben·
wan si sint fúr truren gv̊t·
swem si lieplich blikent tǒgen·
in div herzen mit den ǒgen·
das weis ich wol svnder lǒgen·
dc es von gemv̊ten wiben sanfte tv̊t·

Ich han minnenklich gesvngen·
der vil lieben vnd der minne·
doch lat si mich trurig stan·
so ist mir senden niht gelvngen·
an mines herzen kúniginne·
da von wil ich singen lan·
vnd wil mich von ir scheiden·
got der gebe gelúke vns beiden·
wer aber ich ein wilder heiden·
miner trúwe solt ich bas genossen han·

Anmerkungen (Wikisource)

1. Vorlage: lie-ze.
2. Vorlage: das.