Meije in blvͤt stat

Meije in blvͤt stat·
der walt sich hat·
aber gegerwet
geverwet wol· gen der wunnebernder svmerzit·
secht sich verwet me·
gras vnd klê·
ein lieblich blv̊me·
nach růme gar verwet sich ir blvͤte ane strit·
Meije vns froͤiden git
heide lit·
wunnenklich ge glêntzet verber al·
man hoͤrt vogellin singen ir svͤssen schal·
des sint hoch gemv̊t
wip dv́ froͤwent bas dann alles des meijen blv̊t·

Reinr wip grůs·
tůt sorgen bv̊s·
ir lieplich lachen
ver swachen kan· mangen senden kvmber mit lieber tat·
wol das wip dv́ hat
eren rât·
in ir herz gesenket· so wol ir gar·
reins wibes guͤte tůt sorgen bar·
des sint hoch gemv̊t
wip dv́ froͤwent bas dann alles des meijen blv̊t·^{[WS 1]}

Rost das vsen zêrt^{[WS 2]}·
svs vnder wêrt·
zert wibes minne
die sinne gar an vil mangem manne venus din rob·
der ist manicualt·
gar vngezalt·
sint dinv́ wunder·
besunder gar· dv legst manges schallen sam wasser stǒp·
miltǒ grvͤnes lob
macht tǒb
sust tǒbet dv́ minne mangen man·
doch nieman ir guͤte vol schriben kan·
des sint hoch gemv̊t
wip dv́ froͤwent bas dann alles des meijen blv̊t·^{[WS 3]}

Anmerkungen (Wikisource)

1. Vorlage: des ſint hoch· ⁊c̾·
2. Vorlage: zêret.
3. Vorlage: des ſint hoch· ⁊c̾·