Min frowe iſt ein vngenedic wib

Min frowe iſt ein vngenedic wib·
dc ſi an mir alſo harte miſſetůt·
nv bꝛaht ich doch einen ivngē lib·
ī ir dienſt vn̄ dar zv̊ hohen mv̊t·
owe do wc mir ſo wol·
wie iſt dc nv v̾doꝛben·
was han ich erwoꝛben
anders niht wan kvmber den ich dol·

Ich geſach nie hǒbet bas gezogē·
in ir herze kvnde ich nie geſehen·
ie dar vnder bin ich gar betrogen·
dc iſt an den trúwen mir geſchehen·
moͤht ich ir die ſternen gar
manen vn̄ ſvnnē·
zeigene han gewūnen·
dc wer ir ſo ich iemer wol gevar·

Owe miner wūneklicher tage·
was ich der an ir v̾ſvmet han·
dc iſt iemer mineſ h̾zen klage·
ſol dú liebe an mir alſus zergan·
lide ich not vn̄ arebeit·
die klagete ich vil kleine·
mine zit alleine·
hab ich die v̾loꝛn dc iſt mir leit·

Ich geſach nie ſvſ getane ſitte·
dc ſi ir beſten frúndē were gram·
ſwer ir vient iſt dem wil ſi mitte·
rvnen dc gv̊t ende nie genam·
ich weis wol wies ende ergat·
vient vn̄ frúnt gemeine·
der geſtêt ſi al eine·
ſo ſi mich vn̄ gen vnrehte hat·

Miner frowen darf niht weſen leit·
dc ich rite vn̄ vꝛage ī froͤmedú lant·
vō den wibē die mit werdekeit·
lebent der iſt vil mengú mir erkant·
vn̄ die ſchoͤne ſint da zv̊·
doch iſt ir deheine·
weder groſ noch kleine·
der verſagen mir iemer we getů·