Minne dú hat einen sitte

Minne dú hat einen sitte·
dc si den vermiden wolde·
das gezeme ir bas·
da beswêrt si manigen mitte·
den si niht besweren solde·
we wie zimt ir dc·
ir sint vier vnd zwenzec iar·
vil lieber danne ir vierzeg sin
vnd stellet sich vil úbel sihtz iender grawes har·

Minne wc min frowe so gar·
dc ich wol wiste al ir tǒgen·
nv ist mir so beschehen·
kvmt ein ivnger ieze dar·
so wirde ich mit twerhen ǒgen·
schilhend an gesehen·
armes wib wes mv̊t si sich·
weis got wan dc si liste pfliget·
vnd toren trúget si ist doch elder vil danne ich·

Minne hat sich an genomen·
dc si get mit toren vmbe·
springent als ein kint·
war sint al ir witze komen·
wes gedenket si vil tvmbe·
si ist ioch gar zeblint·
dc si ir ruschen niene lat·
vnd fuͤre als ein bescheiden wib
si stosset sich dc es mir an min herze gat·

Minne sol dc nemen fúr gv̊t·
vnderwilent so si ringet·
dc ich sizen ge·
ich han also hohen mv̊t·
als einer der vil hohe springet·
we was wil sis me·
anders diene ich swas ich mac·
si besv̊che wa die sehse sin
von mir hat si in der wochen ie den sibenden tac·