Minne was hab ich getan der ſvͤſſen

Minne was hab ich getan der ſvͤſſen·
das ſi mich niht in ir hulde wiſſen wil·
ſo das ſi mir werſen well ein gruͤſſen·
tǒgen mit ir ǒgen in mins h̾zen zil·
minne des bewiſe mich
hab ich miſſetan das wil ich buͤſſen·
vf genad vnd wider dienen ſteteklich·

Klag ich ir die ich in h̾zen meine·
kumber den ich dol ſi ſpꝛicht herr was hoͤꝛ ich·
dan ir meinent in liebe mich eine·
das geloͤib ich niemer alſuſt toͤꝛet mich·
ſi vil ſeldenriche gůt·
das ſi mir gelǒben wil ſo kleine·
vn̄ doch froͤiden mich berǒben ſwie man tůt·

Svͤſſe minne wanne wilt dv kêren·
vō mir leit das ich in minem h̾zen han·
ia wer es zit das dv ſoldeſt leren·
liebes liep das ſi mich lieſſe vro beſtan·
wan ſol ich icht vro geſin·
zwar das mv̊s mir komen von der hêren·
der dv geb fv́r eigen gar das leben min·