Minne was hab ich getan der svͤssen

Minne was hab ich getan der svͤssen·
das si mich niht in ir hulde wissen wil·
so das si mir wersen well ein gruͤssen·
tǒgen mit ir ǒgen in mins herzen zil·
minne des bewise mich
hab ich missetan das wil ich buͤssen·
vf genad vnd wider dienen steteklich·

Klag ich ir die ich in herzen meine·
kumber den ich dol si spricht herr was hoͤr ich·
dan ir meinent in liebe mich eine·
das geloͤib ich niemer alsust toͤret mich·
si vil seldenriche gůt·
das si mir gelǒben wil so kleine·
vnd doch froͤiden mich berǒben swie man tůt·

Svͤsse minne wanne wilt dv kêren·
von mir leit das ich in minem herzen han·
ia wer es zit das dv soldest leren·
liebes liep das si mich liesse vro bestan·
wan sol ich icht vro gesin·
zwar das mv̊s mir komen von der hêren·
der dv geb fv́r eigen gar das leben min·