Mir hete wilent zeiner stvnde

Mir hete wilent zeiner stvnde·
so wol gedienet ein man·
das ich im wol gv̊tes gvnde·
des ich im nv niht gan·
sit dc er den mv̊t gewan·
das er an mich eischen begvnde·
des ich im bas verzihen kan·
denne er es vmbe mich gewerben kvnde·

Ich wande das er houesch were·
dar vmb wc ich im holt·
dc rede ich nv wol offenbere·
des ist er von mir vn verscholt·
des hab ich gv̊t gedolt·
sin schade der ist mir vnmere
er iesch al ze richen solt·
des ich von im doch wol enbere·

Er gerte al ze vngefuͤger minne·
an mir der vant er niet·
das wisse er sinem kranken sinne·
das im sin tvmpheit so geriet·
swc schaden im da von geschiet·
des mac er wol werden inneṇ·
das er sin spil niht wohl beschiet·
er brichet ê· das ers gewinne·