Mir ist alle zit als ich vliegende var

Mir ist alle zit als ich vliegende var·
ob al der werlte vnd dú min ellú si·
swar ich gedenke vil wol sprunge ich dar·
swie verre es ist wil ich sost es mir nahe bi·
starc vnd snel beidú riche vnd fri·
ist mir der mv̊t dvr dc lǒfe ich so balde·
mir enmac entrinnen dehein tier in dem walde·
dc ist gar gelogen ich bin swere als ein bli·

Ich mac von froͤiden toben ane strit·
mir ist von minne so liebe geschehen·
swa were ein walt beide lanc vnd wit·
mit schoͤnen bǒmen den wolte ich erspehen·
da moͤhte man mich doh springende sehen·
min reht ist dc ich mich an froͤiden twinge·
wes lúge ich gǒch ine weis wc ich singe·
mir wart nie wirs wil ich der warheit iehen·

Ich mache den merkeren truͤbenden mv̊t·
ich han verdienet ir nit vnd ir has·
sit dc min frowe ist rich vnd gv̊t·
ê wc mir we nv ist mir sanfte vnd bas·
ein herzeleit des ich niene vergas·
dc han ich verlassen vnd ist gar verswunden·
min froͤide hat mich von sorgen enbvnden·
mir wart nie bc· vnd lúge ich iv das·

Mir wil gelingen da mir nie gelanc·
an minne der svͤssen dc wil ich iv sagen·
die merkere habent mengen gedanc·
swenne si mich nv niht mere hoͤrent klagen·
dehein herze ser das tv̊t si mir veriagen·
[…]
des lon ir got dc min truren hat ende·
dc ist gar gelǒgen vnd ist dar doch niht lanc·