Nu ist der bluͤienden heide voget

Nu ist der bluͤienden heide voget·
in gewalt uf vns gezoget
hoͤrt wie mit winde er^{[WS 1]} broget·
uf walt^{[WS 2]} vnd in gevilde·
dis kan nieman vnderstan·
er tů vns den gruͤnen plan·
rosen vnd blůmen ân·
so scharpf ist sin gewilde·
dis secht in den wunnebernden ǒwen·
vnd an kleiner vogellin we·
die ensingent vns nit me·
sus twinget si der kalte sne·
doch sing ich miner vrǒwen·

Si ist rein vnd da bi wol geborn·
die ich ze vrǒwen han erkorn·^{[WS 3]}
ein rose fúr den wilden dorn·
ist si bi andren vrǒwen·
in dem hertzen min dast war·
si ist an allen tugenden klar·
vn lebt ich tusent iar·
ich moͤcht ir wolschǒwe
niemer· dur das wirb ich nach ir hulden·
ob si mir der selden gan·
das ich wird ir dienest man·
was ich vroͤden danne han·
ob ich dis kan· verschulden·

Froͤd vnd wernder wunnen vil·
treit si der ich dienen wil·
lebt ich iemer ane zil·
so han ich si ze vrowen
mir· dem hertzen min bereit·
noch han ich ir nit geseit·
dast mir innenklichen leit·
gar lieblich ist ir schǒwen·
der vil reinen vnd der werden gůten·
we das ist min vngewin·
doch laz ich es uf den sin·
wer ich dúrrer dann ich bin·
alr erst woͤlt ichs ir můten·

Anmerkungen (Wikisource)

1. Vorlage: winde.
2. Vorlage: walt walt.
3. Vorlage: ie ich ze vꝛǒwen han erkoꝛn·
   die ich ze vꝛǒwen han erkoꝛn·