Nv froͤit úch mīnegernde man
[241v]
Nv froͤit úch mīnegernde man·
wiſſent dc úch rehte froͤide machet w̾t·
vn̄ dc niemā w̾den kan·
eren rich wā der mir froͤiden eren gert·
mit zúhtē fro dc iſt ein leben·
dem got vil erē hat gegeben·
Swer w̾der wibe mīne wil·
vn̄ ir grv̊ſ v̾dienen der ſi hohgemv̊t·
ſwie ſelten ich ir mīne ſtil·
doch weis ich wol das gůten wiben ſanfte tůt·
d̾ durh ſiv zuht bi froͤiden hat·
des dienſt in zeh̾zē gat·
Wie ſol ein vngemv̊ter man·
erwerbē hohgemv̊tes wibes habedanc·
wil er ir ertruren[WS 1] an·
dc ſi in mīne ſo iſt ſin tvmber wan vil kranc·
ir hohgemv̊tes herzen rât·
ſin trurē hat voꝛ miſſetat·
Mit ſoꝛgē nieman kan began·
w̾des wibes minne vn̄ ǒch ir frúnteſ grůſ·
truren mac wol miſſegan·
gv̊tē wibē wā da vō wirt eren bůs·
ich rat iv mānen hohen mv̊t·
ſit wibē froͤide ſanfte tůt·
Ich wil hohes mv̊tes ſin·
vn̄ wil dvrh gvͤtiv wib gegen ir min zúrnen lan·
di ich ê hiez die[WS 2] frǒwe min·
ſi weis[WS 3] wol ſelbe wie ſi hat an mir getan·
dc ſi v̾koꝛn dvr gvͤtiv wib·
den iem̾ dienen mv̊s min lip·
Swa ich mich v̾ſvmet han·
an rehtē froͤiden dc ſol man mir v̾gebē·
wan ich wil nv erſt haben an·
mit hohem mv̊te vn̄ mit ritterlichē lebē·
ſw̾ von mir hohes mv̊tes gert·
der wirt deſ volleklich gewert·