Nv hat meige walt heide ǒwe (Mit aufgelösten Abbreviaturen)

Nv hat meige walt heide ǒwe·
wol bekleit mit maniger wnneklichen spehen wat·
also hat mis herzen frowe·
sich bekleit mit kleiden dc ir wnneklich an stat·
wiplich gvͤte schoͤne vnd ere·
da bi reinen mv̊t·
dis gewant treit dv́ vil here·
dc ir edelem herzen sanfte tv̊t·
bi den kleiden lat sich vinden
der vil trútelehte lose lip·


Ach solt ich mich senden vinden·
bi den kleiden die dv́ reine minnekliche an treit·
so mvͤse al min leit verswinden·
vnd wrde an mangen froͤiden wol gemeit·
sol dv́ froͤide an mir verderben·
dc ist mis herzen not·
so mv̊s ich in iamer sterben·
owe svͤsser mvnt dvrlúhtig rot·
wie mich iamert nach den kleiden
sit si stant der lieben also wol·

Wil si minen kvmber wenden·
dú vil reine minnekliche der ich eigen bin·
so sol si dv́ kleit mir senden·
bi dem truͤtelehtem libe so ist min leit da hin·
kan mich ieman fro gemachen·
ia ir roter mv̄t·
wil mir der von herzen lachen·
so wirde ich an froͤiden wol gesvnt·
svͤsse minne bit die heren
dc si troͤste mich vil senden man·