Nv hat meige walt heide ǒwe (Mit originalen Lettern)
[40r]
Nv hat meige walt heide ǒwe·
wol bekleit mit maniger wnneklichē ſpehen wat·
alſo hat mis herzen frowe·
ſich bekleit mit kleiden dc ir wnneklich an ſtat·
wiplich gvͤte ſchoͤne vn̄ ere·
da bi reinen mv̊t·
dis gewant treit dv́ vil here·
dc ir edelem herzen ſanfte tv̊t·
bi den kleidē lat ſich vinden
der vil trútelehte loſe lip·
Ach ſolt ich mich ſenden vinden·
bi den kleiden die dv́ reine minnekliche an treit·
ſo mvͤſe al min leit verſwinden·
vn̄ wrde an mangen froͤiden wol gemeit·
ſol dv́ froͤide an mir verderben·
dc iſt mis herzen not·
ſo mv̊s ich in iamer ſterben·
owe ſvͤſſer mvnt dvrlúhtig rot·
wie mich iamert nach dē kleidē
ſit ſi ſtant der liebē alſo wol·
Wil ſi minen kvmber wenden·
dú vil reine minnekliche der ich eigē bin·
ſo ſol ſi dv́ kleit mir ſenden·
bi dem truͤtelehtem libe ſo iſt min leit da hin·
kā mich ieman fro gemachen·
ia ir roter mv̄t·
wil mir der von herzen lachen·
ſo wirde ich an froͤiden wol geſvnt·
ſvͤſſe mīne bit die heren
dc ſi troͤſte mich vil ſendē man·