Nv her ob ieman kan verneme

NV her ob ieman kan verneme^{[WS 1]}·
des ich von minne kv́nden wil·
ob iv dú rede niht gar enzeme·
verdrîese úch leget mir ein zil·
fúr dc en spriche ich niht me·
swer mich dar an bedenke
der wille^{[WS 2]} mvz an wunsch erge·
es nahet dem tage·
swa sich zwei liebe scheiden·
die haben herzeleide klage·

Es warb ein ritter lange zit·
vmbe eine frowen vil gemeit·
doch wart^{[WS 3]} verendet wol sin strit·
si galt im al sin arbeit·
vil wol nach siner ger^{[WS 4]}·
si beschiet im tǒgenliche
da sin des lones wolde wer^{[WS 5]}·
Es nahet nahet dem tage·
swa sich zwei liebe scheiden·
die haben herzeleide klage·^{[WS 6]}

Dú schone frowe kom gegan·
da si den selben ritter vant·
er wande si ze sich gevan·
in dvhte er were al da· vol ant·
in des hv̊b sich ein dôs·
dc si sich mv̊sten scheiden
des wart ir beider leit gros·
Es nahet dem tage·
swa sich zwei liebe scheiden·
die haben herzeleide klage·^{[WS 7]}

Si waren beide enzúndet gar·
der ritter vnd dú frowe her·
des nan dú minne gv̊te war·
si enlies si langer beiten mer^{[WS 8]}·
si schv̊f vil schiere also·
dc si aber zv̊ ein ander kamen·
vnd wurden wol nah leide vro·
Es nahet dem tage·
swa sich zwei liebe scheiden·
die haben herzeleide klage·^{[WS 9]}

Do alle ir wille wol ergieng·
mit lieben werken da zestvnt·
die frowen er zv̊ sich gevieng·
er kvstes an ir svͤssen mvnt·
er swůr vil túre hie·
im wurde nie so liebe sit dc in got zer werlde lie·
Es nahet dem tage·
swa sich zwei liebe scheiden·
die haben herzeleide klage·^{[WS 10]}

Nach der vil grôzen liebe kam·
im ein vnsenftes vngemach·
dc im der minne ein teil benam·
der lieben frowen er veriach·
er sprach vil schone wib·
dc wir vns mv̊ssen scheiden
des lit gar vroͤidelos min lib·
Es nahet dem tage·
swa sich zwei liebe scheiden·
die haben herzeleide klage·^{[WS 11]}

Dú minnekliche frowe sprach·
froͤi dich trut geselle min·
sit dir so liebe nie geschach·
so her ze mir nv bin ich din·
ich han dich vmbe van·
nv wis in hohem mv̊te
io ist al din wille an mir ergan·
Es nahet dem tage·
swa sich zwei liebe scheiden·
die haben herzeleide klage··^{[WS 12]}

Der ritter gůt sprach do hin zir·
genade frowe kv́nigin·
dv hast so wol gelonet mir·
dc dir iemer sol dc herze min·
gelichen willen tragen·
als min selbes libe
vúr war vernim wc ich dir sage·
Es nahet dem tage·
swa sich zwei liebe scheiden·
die haben herzeleide klage·^{[WS 13]}

ICh sol dir sprach dú frowe her·
getruwen aller stetekeit·
nv tů dur mich ein lútzel mer·
dc dv vermidest sendú leit·
ob ich dir mere bin·
dvne leistes mine lere·
so ist vnser zweier liebe hin·
Es nahet dem tage·
swa sich zwei liebe scheiden·
die haben herzeleide klage·^{[WS 14]}

O wie moht ich leisten dinú wort·
dú dv mir vor gezelt hast·
der liebe vunde nie mir vor gezelt hast·
der liebe vunde nieman ort·
wie nahe dv mir zeherzen gast·
da von ich grossen kvmber dol·
swenne ich mich von dir scheide
des ich von schulden truren sol·
Es nahet dem tage·
swa sich zwei liebe scheiden·
die haben herzeleide klage·^{[WS 15]}

Do^{[WS 16]} sprach dc wunnekliche wib·
nvn trvre niht dc ist min rat·
wiltv verliesen so den lib·
dc ist vn vrumes mannes tât·
dv solt gedvldig si·
swer minnet ane maze
dan ist niht gv̊ter sinne bi·
Es nahet dem tage·
swa sich zwei liebe scheiden·
die haben herzeleide klage·^{[WS 17]}

Swer sich an liebe mazen kan·
der hat mir vngeliches leben·
ia twinget mich vil senden man·
dú minne dc ich mv̊s begeben·
die werlt in kurzen tagen·
nach dinem svͤssen libe
maht dv dc frowe an mir verdagen·
Es nahet dem tage·
swa sich zwei liebe scheiden·
die haben herzeleide klage·^{[WS 18]}

Wie moͤht ich lengen bas din leben·
nv tůn ich alles dc ich sol·
mich selben han ich dir gegeben·
so wand ich dir gesenfte wol·
nv sprich wc wiltv me·
mag ich dir dc gewinnen
dar an sol al din wille ergan·
Es nahet·^{[WS 19]}

Min sorge swachet mir den sin·
des mv̊s ich in den rúwen sîn·
swen ich so lange von dir bin·
dc dv vergissest frowe min·
des mv̊s ich kvmber tragen·
...
das ist min aller meiste klagen·
Es nahet dem tage·
swa sich zwei liebe scheiden·
die haben herzeleide klage·^{[WS 20]}

NV hoͤret wie der frowen gv̊t·
des heldes clage zeherzen gie·
si dahte senften im den mv̊t·
mit armen sin zesich gevie·
si kvst in ane zal·
si sprach gezogenlichen
nv hastv gv̊ter minne wal·
Es nahet dem tage·
swa sich zwei liebe scheiden·
die haben herzeleide klage·^{[WS 21]}

Do sprach der ritter vberlang·
nv hoͤre herze frowe mir·
ein swere tůt mich froͤide kranc·
so mir gedanke koment von dir·
vnd ich din niene han·
so get es an ein truren
des mv̊s ich stete froͤide lan·
Es nahet dem tage·
swa sich zwei liebe scheiden·
die haben herzeleide klage·^{[WS 22]}

Do sprach dú frowe wol getan·
der sorgen solt dv wesen fri·
die wile ich mv̊t ze minnen han·
so sol mir iemer wonen bi·
gůt trutschaft hin zedir·
von herzeklicher liebe
des solt dv wol getruwen mir·
Es nahet dem tage·
swa sich zwei liebe scheiden·
die haben herzeleide klage·^{[WS 23]}

So wol mich dc ich han vernomen·
von dir so wunneklichen trost·
es sol^{[WS 24]} mir al zeheile komen·
ich wird ab aller leide erlost·
sit ich gehoͤret han·
von dir so svͤsse mere
des wil ich alles truren lan·
Es nahet dem tage·
swa sich zwei liebe scheiden·
die haben herzeleide klage·^{[WS 25]}

NV hoͤret wie die lieben do·
ir leit verklageten zehant·
si wurden beide ein ander fro·
dú minnen hent an in geblant·
rúwe sende not·
si sprach min trutgeselle
vns mag niht scheiden wan der tot·
Es nahet dem tage·
swa sich zwei liebe scheiden·
die haben herzeleide klage·^{[WS 26]}

Hie mvget ir merken froͤmde zal·
wie liebe da mit liebe vaht·
e dan si schiden ab den wal·
dc iamer swendet in die naht·
da wc sin vngemach·
er sv́fte inneklichen
do er den morgen schinen sach·
Es nahet dem tage·
swa sich zwei liebe scheiden·
die haben herzeleide klage·^{[WS 27]}

Swer ú von ende solte sage^{[WS 28]}·
wie dc in do dú minne twang·
do er erschrak von dem tage·
es moht in dunken al zelanc·
des wart sin herze ser·
er sprach vil iemerlichen
gebúte mir edelú frowe her·
Es nahet dem tage·
swa sich zwei liebe scheiden·
die haben herzeleide klage·^{[WS 29]}

Dú schone frowe sprach also·
vil lieber lib Nv wis gesvnt·
vil senftes mv̊tes vnd hoh·
si kvsten sich zemaniger stunt·
er sprach trut froͤide min·
lieb vnd ere
heil selde mvͤsse dir sin·
Es nahet dem tage·
swa sich zwei liebe scheiden·
die haben herzeleide klage·^{[WS 30]}

Svs endet sich der zweier strit·
mit svͤssen worten ane has·
swa lieb an liebes arme lit·
die svln iemer merken das·
dc es an ein scheiden ge·
dass aber zesamne denken
wan after rúwe tv̊t vil we·
Es nahet dem tage·
swa sich zwei liebe scheiden·
die haben herzeleide klage·^{[WS 31]}

Anmerkungen (Wikisource)

1. Vorlage: v̾nemē.
2. Vorlage: willen.
3. Vorlage: doch.
4. Vorlage: gern.
5. Vorlage: w̾n.
6. Vorlage: Es nahet dem tage·
7. Vorlage: Es nahet·
8. Vorlage: mere.
9. Vorlage: Es nahet·
10. Vorlage: Es nahet·
11. Vorlage: Es na·
12. Vorlage: Es nahet·
13. Vorlage: Es nahet·
14. Vorlage: Es nahet·
15. Vorlage: Es na·
16. Vorlage: Oo.
17. Vorlage: Es nahet·
18. Vorlage: Es nahet·
19. Vorlage: Es nahet·
20. Vorlage: Es nahet dem ta·
21. Vorlage: Es nahet·.
22. Vorlage: Es nahet·
23. Vorlage: Es na·
24. Vorlage: ſo.
25. Vorlage: Es nahet·
26. Vorlage: Es nahet·
27. Vorlage: Es nahet·
28. Vorlage: ſagen.
29. Vorlage: Es nahet·
30. Vorlage: Es nahet·
31. Vorlage: Es na·