Nv ist der arge winter hie

Nv ist der arge winter hie·
der vns wil betwingen aber leider
die blv̊men vnd den kle·
owe der zerfuͤrt vns ie·
meien sinú wunneklichen kleider·
ich sorge wies erge
wissent swer den winter lang
also mv̊s vertriben·
ane lieben vmbevanc·
wie mag der beliben·
sin froͤide werde kranc·
Liep gedinge tv̊t mich geil·
ich gewinne heil·

Owe lieblich naher smvk·
owe minnekliches vmbevahen·
vnd owe guͤtlich kvs·
owe herzeklicher druk·
wenne sol ich sender den enphahen·
ioch singe ich vmbe sus·
doch gedinge ich dc ir můt·
vnd ir wiblich gvͤte·
dú mich froͤlich singen tv̊t·
hoͤhe min gemvͤte·
si ist so rehte gv̊t·
Liep gedinge tuot mich geil·
ich gewinne heil·^{[WS 1]}

Wer gesach ie frowen lip·
der ir lachen also wol gezeme·
vnd ir vil werder grůs·
es ist manig schone wib·
dú doch niender ist also geneme·
des man ir sprechen mv̊s·
swenne ir roseroter mvnt·
vnd ir liehten ǒgen
blikent in mins herzen grunt·
lachelichen^{[WS 2]} tǒgen·
so wirde ich wol gesvnt·
Lieb gedinge tůt mich geil·
ich gewinne heil·^{[WS 3]}

Wol dir minnenklichv́ fruht·
wol dir^{[WS 4]} dv hast froͤiderich gemvͤte·
vnd doch mit rehter scham^{[WS 5]}·
wol dir dv hast wiblich zuht·
wol dir dv hast vserwelte gvͤte·
mit rehter kúsche alsam·
wol dir dú bist vserkorn·
liep vn wandelbere·
wol dir wan dv bist ver^{[WS 6]} zorn·
vnd fúr sende swere·
an dise werlt erborn·
Liep gedinge tuot mich geil·
ich gewinne heil·^{[WS 7]}

We warvmbe tv̊t si dc·
dc si mir dc herze niht enbindet·
von sender arbeit·
sicherlich ir stuͤnde bas·
sit si mich· so sigelosen vindet·
dc si min sendú leit·
vf genade rieme an sich·
doch in liebem troste·
also dc dú gv̊te mich·
von den banden lôste·
so lepte ich wunneklich·
Liep gedinge tuot mich geil·
ich gewinne heil·^{[WS 8]}

Anmerkungen (Wikisource)

1. Vorlage: Liep gedinge tuot mich ⁊c̾·
2. Vorlage: lache lichelichē.
3. Vorlage: Lieb gedinge tůt mich ⁊c̾·
4. Vorlage: dr.
5. Vorlage: ſchame.
6. Vorlage: v̾er.
7. Vorlage: Liep gedīge·
8. Vorlage: Liep gedinge·