Nv siht man aber die wnneklichen heide

Nv siht man aber die wnneklichen heide·
in speher wat mit blv̊men wol beschoͤnet·
man hoͤret die vogellin in dem walde singen·
den tet der kalte winter vil zeleide·
nv ist aber der walt mit sange wol bedoͤnet·
den hoͤrt man in dv́ oren svͤsse erklingen·
si froͤwent sich gegen des svͤssen meigen blvͤte·
so sent sich min gemvͤte·
nach der vil reinen gvͤte·
dc si mir got behvͤte·

Swas ieman seit so lit der wnsch an wiben·
si kvnnen in dv́ herzen lieplich lachen·
ir loslich ǒgen blike tv̊nt froͤidenriche·
ir reiniv^{[WS 1]} gvͤte kan wol leit vertriben·
so sis mit gvͤte wellent lieblich machen·
ze der froͤide ich in der welte niht geliche·
ach ie doch das tv̊t mir^{[WS 2]} div reine svͤsse·
die ich mit sange grvͤsse·
got mir des helfen mvͤsse·
dc si mir kvmber bv̊sse·

Ir wol geroͤter mvnt ir liehten ǒgen·
ir kel ir kinne ir roͤselehte wangen·
die hant dc sende herze min betwngen·
do si dar in geblihten lieplich tǒgen·
dar nach ze hant do wart ich ir gevangen·
dar zv̊ do kam dú minne dar in gedrvngen·
si sprach nv hab ich mich din vnderwnden·
dc han ich wol befvnden·
an minen senden wnden·
die stent noh vnverbunden·

Was treit úch fúr fro minne ob ich verdirbe·
was hilfet es úch svͤssv́ seldenbere·
dvrh got nv bin ich doch verselt úch beiden·
was treit úch fúr fro minne ob ich erstirbe·
was hilfet úch min lang werendv́ swere·
mich iamert sol min herze von úch scheiden·
sit ich úch han gedienet manige stvnde·
hei kvs von rotem mv̄de·
ob mir din trost des gvnde·
das mich dú liebe enbvnde·

Ich wil den valschen vnd den vngetrúwen·
ze leide singen vnd den edeln ivngen·
ze liebe vnd der vil lieben die ich da minne·
ir valsches herze kan den valsch wol brúwen·
so we in ie wart so we der valschen zvngen·
dv́ valschet in ir herzen vnd mit sinne·
dc schat mir niht ob mich dú svͤsse reine·
wil meinen als ich meine·
si lieben alterseine·
so schat ir has mir kleine·

Anmerkungen (Wikisource)

1. Vorlage: reine.
2. Vorlage: mr.