Nv sol der keiser here

Nv sol der keiser here·
vúr brechen dur sin ere·
des lantgauen missetat
wan er was doch zware·
sin vient offenbare·
die zagen trůgen stillen rat·
si swůrn hie si swúrn dort·
vnd průften vngetrúwen mort·
von rome fůr ir schelten·
ir dvf enmohte sich niht verheln·
si begvnden vnderzwischen steln·
vnd alle einander melden·
seht diep stal diebe
div tet liebe·

Der missenere solde·
mir wandeln ob er wolde·
minen dienst laz ich alles varn·
niwan min lob aleine·
dc in min lob iht meine·
dc kan ich schone wol bewarn·
lob ich in so lob er mich·
des andern alles des wil ich·
in minneclich erlazen·
sin lob dc mv̊s ǒch mir gezemen·
oder ich wil mines her wider nemen·
ze hove vnd an der straze·
so ich nv genv̊g
warte siner vůge·

Ich han dem missenere·
gevvͤget manig mere·
bc danne er nv gedenke min·
wc sol dú rede beschoͤnet·
moͤht ich in han gekroͤnet·
dú krone were húte sin·
het er mir do gelonet bc·
ich diente im aber etewas·
noh kan ich schaden vertriben·
er ist aber so gevuͤge niht·
dc er mir biete wandels reht·
da lazen wirs beliben·
wc vil verdirbet·
des man niht enwirbet·