Nvn iſt niht mere min gedinge

Nvn iſt niht mere min gedinge·
wan das ſi iſt gewaltig min·
bi gewalte ſol genade ſin·
vf den troſt ich ie noch ſinge·
genade dú ſol uberkomen
groſſen gewalt dvrch miltekeit·
genade zimt wol bi richeit·
ir tvgende ſint ſo vollekomen·
das dvrch reht mir ir gewaldes ſol fromen·

Swer ſo ſteten dieneſt kvnde·
des ich mih doch troͤſten ſol·
dem gelvnge lihte wol·
ze ivngeſt er mit vberwnde·
das ſende leit das nahen gat·
das wirt lachen vn̄ ſpil·
ſin truren gat zefreuden vil·
in einer ſtvnde ſo wirt es rât·
das man zehen iar gedienet hat·

Swer ſo langes bîten ſchildet·
der hat ſichs niht wol bedaht·
nah rúwe ſo hat es wnne bꝛaht·
truren ſich mit freudē gildet·
dem der [ſo] wol biten kan·
das er mit zúhten mac vertragen·
ſin leit vn̄ nah genaden klagen·
der wirt vil lihte ein ſelig man·
das iſt der troſt den ich noch han·