O wie froͤmde min lib der minneklichen ſuͤſſen ſi

O wie froͤmde min lib der minneklichen ſuͤſſen ſi·
min herze iſt ir doch ſtete bi·
Das ich ſo gar ſelten zv̊ zir kere·
das lâſſe ich gotweiſ wol durch ir ere·
das ich die behalde vn̄ nit ver ſere·
ſi wiſſe enwere das·
ich wonde ir bi bas vn̄ bas·
Swie froͤmde min lib der minneklichen ſuͤſſen ſi·
min herze iſt ir doch ſtete bi·^{[WS 1]}

Dvrch gůt vn̄ fúr arger hůte melden
ſicht man bi der lieben mich ſo ſelden·
des ſol ſi mich laſſen nit engelten·
bedenket ſi ſich wol·
dur reht ich des genieſſen ſol·
Swie froͤmde min lib der minneklichen ſuͤſſen ſi·
min herze iſt ir doch ſtete bi·^{[WS 2]}

Was geſchehe der hůte dú mich ſcheide·
vō ir ſchoͤner libes ǒgenweide·
lǒb gras blůmen ǒwe walt vn̄ heide·
dú dunkent mich ein nicht·
gegen mines liebes angeſicht·
Swie froͤmde min lib der minneklichen ſuͤſſen ſi·
min herze iſt ir doch ſtete bi·^{[WS 3]}

Anmerkungen (Wikisource)

1. Vorlage: Swie froͤmden min lib et c̾·
2. Vorlage: Swie froͤmde min lib· ⁊c̾·
3. Vorlage: Swie froͤmde min lib· ⁊c̾·