O wie froͤmde min lib der minneklichen suͤssen si

O wie froͤmde min lib der minneklichen suͤssen si·
min herze ist ir doch stete bi·
Das ich so gar selten zv̊ zir kere·
das lâsse ich gotweis wol durch ir ere·
das ich die behalde vnd nit ver sere·
si wisse enwere das·
ich wonde ir bi bas vnd bas·
Swie froͤmde min lib der minneklichen suͤssen si·
min herze ist ir doch stete bi·^{[WS 1]}

Dvrch gůt vnd fúr arger hůte melden
sicht man bi der lieben mich so selden·
des sol si mich lassen nit engelten·
bedenket si sich wol·
dur reht ich des geniessen sol·
Swie froͤmde min lib der minneklichen suͤssen si·
min herze ist ir doch stete bi·^{[WS 2]}

Was geschehe der hůte dú mich scheide·
von ir schoͤner libes ǒgenweide·
lǒb gras blůmen ǒwe walt vnd heide·
dú dunkent mich ein nicht·
gegen mines liebes angesicht·
Swie froͤmde min lib der minneklichen suͤssen si·
min herze ist ir doch stete bi·^{[WS 3]}

Anmerkungen (Wikisource)

1. Vorlage: Swie froͤmden min lib et c̾·
2. Vorlage: Swie froͤmde min lib· ⁊c̾·
3. Vorlage: Swie froͤmde min lib· ⁊c̾·