Owe das ich ſi miden ſol
[55r]
Owe das ich ſi miden ſol·
ze keiner zit·
durh ſwachen nit·
die ich mv̊s iem̾ minnen·
dc tůt vil maniges h̾zen wol·
der ſinen mv̊t·
hat gar behv̊t·
voꝛ tǒgēlichen ſinnen·
Ich bitte got dc ime beſche·
als ich im gan·
der mir erban·
ir minneclichen gvͤte·
Wan haſſent ſi dē kalten ſne·
vn̄ gvnden mir·
ob ich an ir·
erwurbe ein hoh gemv̊te·
Ja mvͤſte er han gelúkes rat·
der dar verdienen wolde·
ich wene es were ein miſſetat·
ob ich ſi minnē ſolde·
ich neme ſwie es mir dꝛvmbe ergat·
ir roten mvnt ze ſolde·
fúr tvſent march vn̄ ob der pfat·
fluſſe von rotem golde·
des moͤhte ich ſenfter enig ſin·
gelǒbent dc·
mir tete bas·
d̾ w̾lte has·
danne ob ich ſi ze langer zit v̾bere·
Mir tv̊t ir liehter ǒgen ſchin·
den lib ſo clar·
dú rede iſt war·
dc man ein har·
ſehe in dem herzen ſwanne ich bi ir were·
Jch wil ir dienen ane zil·
des habe ich reht·
en eben ſleht·
wer ich ir kneht·
ob ſi mir niemer liebes iht getete·
ovch duhte mich der ſelden vil·
dc ich ſi ſach·
vn̄ mir geſchach·
ein vngemach·
da vō ich ir mv̊s iemer weſen ſtete·
Sin welle ir gvͤte an mir began·
vf der genade ich ſinge·
ſo mv̊s ich ſtete vnfroͤide han·
ſwie mir dar an gelinge·
ſi ſol mich niht verderben lan·
wande ich vf gv̊t gedinge·
mit trúwen ir bin vndertan·
vn̄ dar nach iemer ringe·
dc ich ir ere·
gerne mere·
ſo vil als ich beſte kan·
wande ich ſi mir erwelt han·
vs allen gv̊ten wiben·
ich wil bi ir beliben·
ob ſi es gerůchet·
ſwer mich ſv̊chet·
dem zeige man mich da·
weiſgot vn̄ niender ander ſwa·
vntz ich der ſele walde·
voꝛ dem grvͤnē walde·
ſvln wir beginnen·
ſchone minnē·
ſi mich vn̄ ich gerne ſi·
ſo[WS 1] wirde ich aller ſoꝛgen vꝛi·
ſo lebe ich niht vngerne·
ob mir der tageſt̾ne·
gelit ſo nahe·
vn̄ vmbe vahe·
ich ſi dc laſſen ane zoꝛn·
dú rede were eht gar v̾loꝛn·
dc nide ſwer der welle·
ſolde ich da vō die helle·
beſchǒwen innē·
ſelker minnen·
mvͤſt ich pflegē da zehant·
ob es da were alſo gewant·
dc mir dú ſchone gvnde·
dc ich ir alſe ich kvnde·
der blv̊mē bꝛeche·
da gereche
ich mine lange ſwerê alſo·
da vō dc min gemvͤte fro·
belibe zallen ziten·
ob ichs kan erbiten·
ſo wirt mir alles des ich ger·
ob ich da gv̊t gelúke han·
der rede mohte ſin min wer·
der babeſt da von lateran·
dc ſi mich wert·
des ich gegert·
nv lange han mit ſtete·
alder aber giht·
ich tv̊ns niht·
ob er mich iemer bete·
Es lit an ir·
ſwas iemer mir·
beſchehen ſol ze heile·
ſi troͤſte mich·
ſo hangen ich·
an dem rades teile·
Da maniger hanget ane troſt·
der doch genaden dinget·
dc er vō rúwen w̾de erloſt·
vn̄ dar nach iemer ringet·
Jſt dc ich niht gewinne·
lon vō ir gewalt·
ſo mv̊s ich gar ane ſinne·
lǒfen in den walt·
mines h̾zen kúniginne·
der ich bin verſalt·
dú ſol mir ir ſvͤſſen mīne·
teilen menicvalt·
ſo dc geſchehe·
dc ich ſpehe·
weiſ got nv vil mengen tag·
mit dienſte als ich beſte mag·
dc mir ir ſchonē ǒgen
als ichs gemeine tǒgen·
ze heile winken·
ſolde ich hinken·
dvr dc eine tvſent iar·
an minen beinen dc iſt war·
dc ich es gerne tete·
vf alſe gv̊t gerete·
Sol ein man·
ſchaden han·
es iſt reht·
das der kneht·
diene wol·
da er ſol·
lon enpfan·
alſo han·
ich vil gar·
ſelten war·
nam[WS 2] ſi doch·
deſ ich noch·
ie geſpꝛach·
ſin geſach·
nie dvrh dc
deſte bas·
her ze mir·
doch ich ir·
ſtete bin·
min gewin·
wc ie noch kleine da·
in geſv̊che anderſwa·
niemer ſolt·
vnverſcholt
were ich ir iemer holt·
Ich lide groſſe ſw̾e
die ich doch iemer gerne dol·
wie kvme ich ir enbere·
ſi tv̊nt mîme h̾zen wol·
ſwie ſi des niht gelǒbet·
dc ich ir holdes herze trage·
dú mich der ſinne rǒbet·
da mitte ich ir genadē iage·
Solde ich des riches krone·
vō rehte tragē iemer me·
genige ich niht ir lone·
ſo gros als vmbe eine bone·
mir tete dannoch ir laſter iemer wê·