Owe das ich si miden sol
[55r]
Owe das ich si miden sol·
ze keiner zit·
durh swachen nit·
die ich mv̊s iemer minnen·
dc tůt vil maniges herzen wol·
der sinen mv̊t·
hat gar behv̊t·
vor tǒgenlichen sinnen·
Ich bitte got dc ime besche·
als ich im gan·
der mir erban·
ir minneclichen gvͤte·
Wan hassent si den kalten sne·
vnd gvnden mir·
ob ich an ir·
erwurbe ein hoh gemv̊te·
Ja mvͤste er han gelúkes rat·
der dar verdienen wolde·
ich wene es were ein missetat·
ob ich si minnen solde·
ich neme swie es mir drvmbe ergat·
ir roten mvnt ze solde·
fúr tvsent march vnd ob der pfat·
flusse von rotem golde·
des moͤhte ich senfter enig sin·
gelǒbent dc·
mir tete bas·
der werlte has·
danne ob ich si ze langer zit verbere·
Mir tv̊t ir liehter ǒgen schin·
den lib so clar·
dú rede ist war·
dc man ein har·
sehe in dem herzen swanne ich bi ir were·
Ich wil ir dienen ane zil·
des habe ich reht·
en eben sleht·
wer ich ir kneht·
ob si mir niemer liebes iht getete·
ovch duhte mich der selden vil·
dc ich si sach·
vnd mir geschach·
ein vngemach·
da von ich ir mv̊s iemer wesen stete·
Sin welle ir gvͤte an mir began·
vf der genade ich singe·
so mv̊s ich stete vnfroͤide han·
swie mir dar an gelinge·
si sol mich niht verderben lan·
wande ich vf gv̊t gedinge·
mit trúwen ir bin vndertan·
vnd dar nach iemer ringe·
dc ich ir ere·
gerne mere·
so vil als ich beste kan·
wande ich si mir erwelt han·
vs allen gv̊ten wiben·
ich wil bi ir beliben·
ob si es gerůchet·
swer mich sv̊chet·
dem zeige man mich da·
weisgot vnd niender ander swa·
vntz ich der sele walde·
vor dem grvͤnen walde·
svln wir beginnen·
schone minnen·
si mich vnd ich gerne si·
so[WS 1] wirde ich aller sorgen vri·
so lebe ich niht vngerne·
ob mir der tagesterne·
gelit so nahe·
vnd vmbe vahe·
ich si dc lassen ane zorn·
dú rede were eht gar verlorn·
dc nide swer der welle·
solde ich da von die helle·
beschǒwen innen·
selker minnen·
mvͤst ich pflegen da zehant·
ob es da were also gewant·
dc mir dú schone gvnde·
dc ich ir alse ich kvnde·
der blv̊men breche·
da gereche
ich mine lange swerê also·
da von dc min gemvͤte fro·
belibe zallen ziten·
ob ichs kan erbiten·
so wirt mir alles des ich ger·
ob ich da gv̊t gelúke han·
der rede mohte sin min wer·
der babest da von lateran·
dc si mich wert·
des ich gegert·
nv lange han mit stete·
alder aber giht·
ich tv̊ns niht·
ob er mich iemer bete·
Es lit an ir·
swas iemer mir·
beschehen sol ze heile·
si troͤste mich·
so hangen ich·
an dem rades teile·
Da maniger hanget ane trost·
der doch genaden dinget·
dc er von rúwen werde erlost·
vnd dar nach iemer ringet·
Ist dc ich niht gewinne·
lon von ir gewalt·
so mv̊s ich gar ane sinne·
lǒfen in den walt·
mines herzen kúniginne·
der ich bin versalt·
dú sol mir ir svͤssen minne·
teilen menicvalt·
so dc geschehe·
dc ich spehe·
weis got nv vil mengen tag·
mit dienste als ich beste mag·
dc mir ir schonen ǒgen
als ichs gemeine tǒgen·
ze heile winken·
solde ich hinken·
dvr dc eine tvsent iar·
an minen beinen dc ist war·
dc ich es gerne tete·
vf alse gv̊t gerete·
Sol ein man·
schaden han·
es ist reht·
das der kneht·
diene wol·
da er sol·
lon enpfan·
also han·
ich vil gar·
selten war·
nam[WS 2] si doch·
des ich noch·
ie gesprach·
sin gesach·
nie dvrh dc
deste bas·
her ze mir·
doch ich ir·
stete bin·
min gewin·
wc ie noch kleine da·
in gesv̊che anderswa·
niemer solt·
vnverscholt
were ich ir iemer holt·
Ich lide grosse swere
die ich doch iemer gerne dol·
wie kvme ich ir enbere·
si tv̊nt mîme herzen wol·
swie si des niht gelǒbet·
dc ich ir holdes herze trage·
dú mich der sinne rǒbet·
da mitte ich ir genaden iage·
Solde ich des riches krone·
von rehte tragen iemer me·
genige ich niht ir lone·
so gros als vmbe eine bone·
mir tete dannoch ir laster iemer wê·