Owe der so selig were
[241r]
Owe der so selig were·
der vns kvnde geben rat·
fúr die manigvalden swere·
da div werlt mit vmbe gat·
owe so gemeiner sorgen·
wa hat froͤide sich verborgen·
die en vinde ich hie noch da·
Moͤht ich iender froͤide vinden·
da fvnde ich ǒch ere bi·
dvrh dc sol ich niht erwinden·
ich envinde wa si si·
vnd erwirbe ich froͤide vnd ere·
wc bedarf ich selden mere
wie kan mir gelingen bas·
Rehter froͤiden swer der waldet·
der hat iemer núwe ivgent·
so tv̊t sorge· dc man aldet·
vnd verderbet mange tvgent·
froͤide ist suͤsse sorge ist sv̂re·
ich wc sorgen nach gebure·
dú hat mir erleidet sich·
Dvr dc sol ǒch ich si leiden·
gůten lúten swa ich kan·
mag ich ich wil von ir scheiden·
von ir sin ein vrier man·
got vor sorgen mih behuͤte·
dar zv̊ bit ich wibes gvͤte·
dc ir hv̊te mich bewar·
Gvͤtú wib svͤsse vnd reine·
der ist noch wunder [241v] swa si sîn·
hei funde ich der gv̊ten eine·
der gebe ich dc herze mîn·
ich wolde ir zehulden singen·
ir lop also hohe bringen·
das sis mvͤse danken mir·
Got gebe dc ich si noh vinde·
der gemvͤte si so gv̊t·
dc si sich min vnderwinde·
mir zehohen minen mv̊t·
vinde ich die so vinde ich ere·
so getrur ich niemer mere
niemer wirde ich me vnfro·