Owe edlú frowe here (Mit aufgelösten Abbreviaturen)

Owe edlú frowe here·
wan verdenkent ir úch an mir bas·
io wil ich iv iemer mere·
dienen vnd tůn mit trúwen dc·
liden mvͤs ich vngemach·
ob mir wurde ein wib so lieb als ir sit ich úch erst gesach·

Dar an svlt ir wesen stête·
ir sit so das es wol erit mich·
so mich ieman gůter bête·
svs gefuͤger dinge dú tete ich·
nie der wille an mir gelag·
ich gewer úch gúter dinge vnd gespar dc niemer tag·

Frowe tůt genedeklichen·
an mir dirre bette gat mich not·
dc ir als vnendelichen·
dike redent owe das ist der tot·
ob úwer minne mich vergê·
so froͤwen sich die froͤide haben vnd si in wol vnd mir si wê·

Solhe froͤide die man zeren·
mac gezeln an meniger stet·
vnd mir nieman mac verkeren·
der gewer ich úch mit kurzer bet·
vnd gewer úch niemer so·
dc ir fro belibet vnd ich dar vnder si vnfro·

Ich han úch vor allen wiben
mir zestêter froͤide erkorn·
sol dú froͤide also beliben·
ach was gůtes wanes da ist verlorn·
e aber ich die rede begebe·
so wil ich iv froͤide gvnne vnd mir leides die wile ich lebe·