Owe edlú frowe here (Mit originalen Lettern)

Owe edlú frowe here·
wan v̾denkent ir úch an mir bas·
io wil ich iv iem̾ mere·
dienē vn̄ tůn mit trúwē dc·
lidē mvͤs ich vngemach·
ob mir wurde ein wib ſo lieb als ir ſit ich úch erſt geſach·

Dar an ſvlt ir weſē ſtête·
ir ſit ſo das es wol erit mich·
ſo mich iemā gůt̾ bête·
ſvs gefuͤger dinge dú tete ich·
nie der wille an mir gelag·
ich gewer úch gúter dinge vn̄ geſpar dc niem̾ tag·

Frowe tůt genedeklichē·
an mir dirre bette gat mich not·
dc ir als vnendelichen·
dike redent owe das iſt d̾ tot·
ob úw̾ mīne mich v̾gê·
ſo froͤwen ſich die froͤide haben vn̄ ſi in wol vn̄ mir ſi wê·

Solhe froͤide die man zeren·
mac gezeln an meniger ſtet·
vn̄ mir niemā mac v̾keren·
der gewer ich úch mit kurzer bet·
vn̄ gewer úch niem̾ ſo·
dc ir fro belibet vn̄ ich dar vnd̾ ſi vnfro·

Ich han úch voꝛ allen wibē
mir zeſtêter froͤide erkoꝛn·
ſol dú froͤide alſo belibē·
ach was gůtes wanes da iſt v̾loꝛn·
e aber ich die rede begebe·
ſo wil ich iv froͤide gvnne vn̄ mir leides die wile ich lebe·