Owe war sint verswnden alle mine iar
[144v]
Owe war sint verswnden alle mine iar·
ist min leben mir getrǒmet oder ist es war·
das ich ie wande das iht were was das iht·
darnach han ich geslaffen vnd enweis es niht·
nv bin ich erwachet vnd ist mir vnbekant·
das mir hievor was kv́ndic als min ander hant·
lúte vnd lant dannan ich von kinde bin geborn·
die sint mir froͤmde worden· reht als ob es si gelegen·
die mine gespiln waren die sint trege vnde alt·
bereitet ist das velt· verhǒwen ist der walt·
wan das dc wasser flúzet als es wilent [145r] } vlos·
fúrwar ich wande min vngelúke wrde gros·
mich grvͤzet maniger trage· mich der bekande ê wol·
dv́ welt ist allenthalben vngnaden vol·
als ich gedenke an manigen wnneklichen tac·
die mir sint enphallen als in das mer ein flac·
iemer mere ǒwe·
Owe wie iêmerliche ivnge lúte tv̊nt·
den nv vil núwekliche ir gemvͤte stv̊nt·
die kvnnen núwan sorgen ǒwe wie tv̊nt si so·
swar ich zer werlte kere· da ist[WS 1] nieman vro·
tanzen singen zergat mir sorgen gar·
nie kristen man gesach so iemerliche iâr·
nv merkent wie den frǒwen ir gebende stat·
die stolzen ritter tragent doͤrpelliche wât·
vns sint vnsenfte brieve her von rome komen·
v́ns ist erlǒbet trvren vnd froͤide gar benomen·
das mvͤt mich inneklichen sere· wir lebten ie vil wol·
das ich nv fúr min lachen weinen kiesen sol·
die wilden vogel· betrvͤbet v́nser clage·
was wnders ist ob ich da von verzage·
was spriche ich tvmber man· dvrch minen boͤsen zorn·
swer dirre wnne volget der hat iene dort verlorn·
iemer mer ǒwe·
Owe wie v́ns mit svͤssen dingen ist vergeben·
ich sihe die bittern gallen mitten in dem honige sweben·
dv́ welt ist vzzen schoͤne· wîs grvͤn vnd rot·
vnd innan swarzer varwe vinster sam der tot·
swen si nv verleitet habe der schǒwe sinen trost·
er wirt mit swacher bůze grozer sv́nde erlost·
daran gedenkent ritter es ist úwer[WS 2] ding·
ir tragent die liehten helme vnd manigen herten ring·
dar zů die vesten schilte vnd die gewihten swert·
wolte got wer ich der signv́nfte wert·
so wolte ich notig man verdienen richen solt·
ioch meine ich nit die hv̊ben noch der herren golt·
ich wolte selbe crone eweklichen tragen·
die moͤhte ein soldener mit sime sper beiagen·
moͤhte ich die lieben reise gevarn v́ber sê·
so wolte ich denne singen wol vnde niemer mer ǒwê·