Philippe kúnig here (Mit originalen Lettern)

Philippe kúnig here·
ſi gebent dir alle heldes woꝛt·
vn̄ wolten liep nach leide·
nv haſtv gůt vn̄ ere·
dar zv̊ wol zweier kúnige hoꝛt·
die gib d̾ milte beide·
dú milte lonet ſam dú ſât·
dv́ wūnekliche wider gat·
dar nach mā ſi gewoꝛfen hat·
wirf vō dir miltekliche·
ſwelh kv́nig der milte geben kan·
ſi git im dc er nie gewan·
wie alexand̾ ſich v́ſan·
der gab vn̄ gab do gab ſi im elliv riche·

Her voltnant habt irs ere·
dc ir den meiſtern tretten welt·
ir meiſterlichen ſpꝛúche·
lât iv geſchehē niht mere·
ſit dc mans iv zvn wizen zelt·
wan ob her walther krúche·
man heten doch vil bas danne iv·
er iſt das koꝛn ir ſit dú ſpꝛiv·
ſingent ir eins er ſinget dꝛiv·
ir ſit gelich als ars vn̄ mane·
her walther ſinget ſwas er wil·
deſ kvrzen^{[WS 1]} vn̄ des langen vil·
ſvs meret er der welt ir ſpil·
ſo iagent ir als ein valſcher hvnt nach wane·

Anmerkungen (Wikisource)

1. Vorlage: kvrken.