Schǒwent wie dú heide sich enpferwet

Schǒwent wie dú heide sich enpferwet·
liehte blv̊men vnd gras·
hant ir gelfen vnd ir wunneklichen schin verlorn·
in ein truͤbes kleit der walt sich gerwet·
der mit gruͤnem lǒbe was·
vmbevangen^{[WS 1]} húre blv̊te manic rose dorn·
der vil schone zierte dc gevilde·
nv sint sine lǒber val·
ir gedoͤne seltzen vnd wilde·
sanc dú liebe nahtegal·
dú fúr suͤsse stimme sendes truren hat erkorn·

Klage ein man niht lilien vnd rosen·
noh div kleinen vogellin·
der mit herzeliebe iarlanc spilnder wunne pfliget·
der vergisset wol der zitelosen·
swenne er bi dem trute sin·
nahe vnd wunnekliche dise lange Nehte liget·
im ist bas danne ob er viol breche·
wan sol wib fúr blv̊men loben·
swer niht wol getrúwen frowen spreche·
der wolte an im selben toben·
we dem manne der niht hohe wibes gvͤte wiget·

PRisen wir die minneklichen frowen·
fúr des liehten meien blv̊t·
vnd fúr der wilden kleinen^{[WS 2]} vogelline sanc·
ir geberde ir lachen vnd ir schǒwen·
heilent minne siechen mv̊t·
bas danne alle blůmen schone rot gel vnd blanc·
wib sint besser danne vil gesteines·
oder silber vnd golt·
vf der erden wart nie niht so reines·
sam der svͤssen wibe solt·
Wol im der verschulden kan ir senften vmbevanc·

Anmerkungen (Wikisource)

1. Vorlage: vnbevangen.
2. Vorlage: kleine.