Seht an die wunneklichen zit

Seht an die wunneklichen zit·
dú mit spilnder guͤte·
gelfe rosenhuͤte·
bringen aber sol·
dú heide in liehter varwe lit·
von des meien bluͤte·
froͤiderich gemvͤte·
zimet den ivngen wol·
zieren kan sich dc gevilde·
gruͤne sint berge vnd tal·
da dú liebe nahtegal·
vnd dú lerche wilde·
sanges ein vnbilde·
schellent vber al·
Meien blůt·
hohgemv̊t·
sendes herzen sinne minneklichen tůt·

Geblvͤmet schone stet der plan·
da von wil ich kosen·
vs der velse klosen·
brvnnen klingent da·
man siht dvrh gruͤnes gras vf gan·
gelwe zitelosen·
bi den roten rosen·
glentzent viol bla·
durh die swarze dorne lachet·
wissú blv̊t vil manicvalt·
die sehs varwe treit der walt·
der von doͤnen krachet·
vnd vs lǒbe machet·
kleider wol gestalt·
Meien blůt·
hohgemv̊t·
sendes herzen sinne minneklichen tůt·^{[WS 1]}

So wol dem manne der nu si·
vro von wibes minne·
dem wirt vsse vnd inne·
wunnen vil bereit·
wan im der bernden bǒme zwi·
grůnet nach gewinne·
dc im sine sinne·
machet vil gemeit·
lieb nah herzeliebe denket·
vnd midet leiden pin·
so dú blůt ir gelfen schin·
sinen ǒgen schenket·
vnd dú lerche klenket·
in dc ore sin·
Meien blůt·
hohgemv̊t·
sendes herzen sinne minneklichen tůt·^{[WS 2]}

Anmerkungen (Wikisource)

1. Vorlage: Meiē blůt·
2. Vorlage: Meien blůt ⁊c̾·