Uff fastnacht hat eyn erbar radt daß strohe und mist lassen von der banhe fhuren und widerumb sandt lassen hynauf fhuren etc. Aldo hat m. g. h. h. Friderich gerandt und volgende getornirt, aldo hat m. g. h h. Jorge S. F. G. den rynnespiß und tornirspiß uff die bhane und wider dorvon gefurt und haben alzo die fastnacht frolich beschlossen.
Dornstag nach dem aschtage [20. Febr.] haben m. g. h. h. Jorge und h. Friderich sampt m. g. f. und dem gantzen frawenzcymmer der furstin mutter und die andern kegen Meissen mit grosser herligkeit beleitet.
Aldo zu Meissen ist m. g. h. h. Friderich waß schwach wurden und uffn sonnabent wider kegen Dresden kommen, aldo umbgegangen, uff die mitwoche [26. Febr.] hat sich Seine F. G. lassen hossen und eynnesteln und zimlich zupaß wurden, gessen und getruncken, wie die dorvon geredt, die solchs gesehen. Nach mittage hat doctor Auerbach m. g. h. genotiget, einen tranck zu nhemen, alz hetteß m. g. alter her befolen, welchs sich S. F. G. langes gewert; alz ader der doctor nicht hat ablassen wollen und S. F. G. gedrungen, solchen tranck zu nhemen, und were sunderlich m. g. alten h. befehel, hat sich der hochgedachte furst h. Friderich des hern vatern gehorsams gehalten und den tranck zu sich genommen. Alzsbalde S. F. G. den tranck genommen, hat S. F. G. gesaget: O her doctor, wie wehe wirt mir, was hat er mir vor einen tranck gegeben. Und alzo omechtig wurden und umb zwe nach mittage uff die mitwoche nach invocavit des selbigen tages die schult der natur betzalet und in gott vorstorben. Gott wolle S. F. G. gnedig sein etc.
Uffn dornstag haben die doctores als doctor Awerbach und doctor Cristofferus Sporer S. F. G. uffgemacht und aldo befunden, das lunge und leber gantz faul gewest und das hertze auch anbrochigk gewest.
Uffn freytagk ist m. g. f. und h. h. Friderich mit aller sollennitet zum Heiligen Creutz getragen und aldo seint drey messen gesungen wurden und sechs oppergenge uff zcehen altarien gehalden. Do die ampter der messen vorendet, haben sie vilgedachten m. g. h. h. Friderich auß der kirchen getragen und uff eynen wagen gelegt, doruff her Johan Ertzprister und her Johan zu Hoffe gesessen und alzo mitte kegen Meyssen gefaren, den loblichen fursten uffn thum begraben und uffn sonnabent zu obent widerkommen.
Es seint auch alle radtmanne mit iren weibern mitte gegangen und unßern g. h. vom schlosse in die kirchen beleitet, aldo die 6 oppergenge mitte gegangen, die burgermeister alz Hans Gleinigk, Peter Bhener, Greger Bhener und Frantz Schmeisser in schwartzen menteln und huthen nachgefolget und entlichen u. g. h. h. Friderich biß kegen Aldendresden under das thor beleitet, do sere vil volckis mitte gegangen und weib und man geweynet etc.
Lieben getrewen, nachdem und als der almechtige got den hochgepornen fursten hern Friederichen hertzogen zu Sachsen etc. unsern ainigen unnd gelibten sohn mithwochs nach invocavit nechst vorschinen von diesem jammerthal genommen, welchs sehlen sein gothliche almacht geruche gnedigk und barmhertzig zu sein, und aber wyr Sein Lieb als eynen gehorsamen sohn beßundern hertzlich gelibt, das uns ob diesem falh nicht wenigk trübsals enthstanden, szo erkennen wyr uns auch Seyner Lieb nach yhrem todt guts zu thun und fur derselben sehlen bitten zu lassen schuldig, und seindt demnach bedacht vormittelst gothlicher vorleihung Seyner Lieb dreyssigsten auf den dornstag nach judica [27. März] mit vigilien und volgendes freitags dehn selhmessen zu Meissen am ort Seyner Lieb begrebnus zu halthen, gnediglich begerendt, etzliche aus ewerm mittel wollthen desselben tags an dem bestimpten ort zceithlich einkommen, das begencknus in andacht neben uns helfen volbrengen, und wann solchs beschehen, dasjhenige so wyr euch furhalthen werden, daran dan gemeiner landtschaft mercklichen gelegen, anhohren und uns darinnen ewern rath mithteilen. Daran beschiet uns zu dem, das es pillich, beßunder guts gefallen. Datum Dreßden dornstags nach reminiscere [6. März] anno domini 1539.
Uffn dornstag nach judica [27. März] seint Peter Bhener, Greger Bhener bayder burgermeister, Frantz Schmeisser und Martinus Heuseler statschreiber uff forderung m. g. h. kegen Meyssen zum begengnuß getzogen und uffn obent umb eyn hora zur vigilien in iren trauermanteln uffn thum gegangen. Aldo seint die drey burgermeister von Leiptzigk alz Wideman, Morch und doctor Fachs auch beschriben und kegenwertig gewest. Nach gehaldener vigilien seint die von stetten sampt etzlicher m. g. h. rethen in die sylberkammer gegangen und aldo das obentmal gehalden.
Uffn freytag fruhe umb 6 hora widerumb uffn thum gegangen und aldo hat der abt von Kemnitz das erste selampt gehalden, dorynne zwene oppergenge gehalden, volgende der bischof von Mersseburgk das andere ampt der conpassione, aber zwene oppergenge, und nach diesem ampt hat der thumprediger geprediget und under andern worthen m. g. h. h. Fryderich alz einen gehorsamen ßon seines vatern uffs hochste promovirt und zuletzt wollen probiren, das die communion sub una specie allein und nicht sub utraque were eingesatzt etc. ader dorvon zumol ubel beschlossen. Nach der predigt der bischof von Meyssen das dritte ampt gehalden und aber zwene oppergenge gehalden etc. Nach ampt zu tische etc.
Dr. Otto Richter (Hrsg.): Dresdner Geschichtsblätter Band 3 (1901 bis 1904). Wilhelm Baensch Dresden, Dresden 1901 bis 1904, Seite 277. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Dresdner_Geschichtsbl%C3%A4tter_Dritter_Band.pdf/297&oldid=- (Version vom 12.11.2024)
