|
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen |
|
|
Es ist von noetten zuo wissen / eyn fuergebene lini sie sey lang oder kurtz / in drey gleiche theyl zuoteylen / Dem thue also / die fuergeben lini sey .a.b. die setz vnden auff ein zwerch lini .c.d. darnach nym mit einem zirckel mynder dann die halb leng / von der aufrechten .a.b. vnd setz den zirckel mit dem ein fuß / auff die zwerch lini /c.d. neben die lini /a.b/ vnd miß damit .3. leng auffrecht vbersich / vnd zeuech ein gerade lini dardurch / also das sie paralel sey gegen .a.b/ Dise lini sey oben .e. vnden .f. vnd die zween mittel punckten so die /3. gleiche felt machen / die betzeichen mit zyffern /1/2/ Darnach zeuech von dem end /e/ ein gerade ort lini herab auff das end .a/ vnd fort hynauß byß auff die zwerch lini /c.d/ vnnd wo sie anruert setz eyn g / Darnach zeuch auß dem punckten /g/ zwue gerad ortlinien in die punckten /1/2/ so wirdet die lini /a.b/ von dem durchschneiden der ort lini / die itz getzogen sind in /3/ gleyche felt geteilt. Noch ein andre meinung / ein lini in /3/ gleiche theil zuoteylen mach vier zwerch barlinien mit zyffern /l/2/3/4 in gleicher weyten obeynander / darnach nym dein fuergenuome lini oben .a. vnden .b. vnd lein sie mit dem ein end /a/ oben an die zwerch lini /1/ vnd vnden mit dem end .b. an die zwerchen .4. so teylen die mittlern zwuo zwerchlini .2.3 die lini .a.b. in drey gleiche teyl wie jch das hie vnden auch hab aufgeriessen. Item ehe jch weytter kome will jch vor eyn lini recht in der mitt von einander leren theylen. vnd das also / Die fuergegeben lini / sey vber zwerch .a.b. nun nym ein zirckel setz jn mit dem ein fuß in den punckten .a. vnd den andern fuß in den punckten .b. vnd reiß vondann vndersich vnd vbersich / so weyt du des bedarfst / Darnach laß den ein fuß des zirckels still sten / in den punckten .b. vnd reiß mit dem andern fuß auß dem punckten .a. krum vbersich vnd vndersich / Wo dann dise zwen zirckelryß sich schliessen / da setz oben ein .c/ vnd vnden ein .d/ Darnach reiß ein gerade lini .c/d. die schneidet .a.b. in der mit von einander / da setz ein /e. Item wer ein gerade lini auff ein zirckeltrum will setzen / der thuoe jm zuegleicher weiß / wie oben angetzeigt ist / laß das zirckeltrum .a.b. seyn / vnd die gerade lini .c/d. auch soll man in ein holl zirckeltrum / so man des bedarff / der obgemelten meinung nach / ein aufrecht lini setzen / Solch beyde weg hab jch hieunden auffgeriessen / vnnd bey dem holen zirckeltrum hab jch in der auffrechten .c.d. da sie durchschneydt ein .f. gesetzt.
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 24. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_024.jpg&oldid=- (Version vom 31.7.2018)
