Si koment vnderwilent her

Si koment vnderwilent her·
die bas daheime moͤhten sin·
ein ritter des ich lange ger·
bedehte er bas den willen min·
so were er zallen ziten hie·
als ich in gerne sehe·
owe was sv̊chent die·
die nîden dc ob ieman gůter lieb geschehe·

Mir ist beschehen dc ich niht bin·
langer fro wan vntz ich lebe·
si wundert wer mir schonen sin·
vnd dc hohgemvͤte gebe·
dc ich ze der werlte niht getar·
ze rehte also gebaren·
nie genam ich frowen war·
ich were in holt die mir ze masse waren·

Genade sv̊chet an ein wib·
min dienst nv vil manigen tac·
durh einen also gůten lib·
die not ich gerne liden mac·
ich weis wol dc si mich geniessen lat·
miner grôssen stete·
wa neme si so boͤsen rat·
dc si an mir missetête·

Gnaden ich gedenken sol·
an ime der minen willen tůt·
sit dc er mir getrvwet wol·
so wil ich hoͤhen sinen mv̊t·
wese er mit rehter stete fro·
ich sage im liebú mêre·
dc ich in gelege also·
mich dúhte es vil ob es der keiser were·