Svmer ǒget sine wunne

Svmer ǒget sine wunne·
dc ist an der zit
pruͤue er wol swer tihten kv́ne·
Was materie lit·
an dem walde vnd vf der heide breit·
wan mag schowen
wie die ǒwen
stant bekleit
wc der anger liehter blv̊men treit·
Est ein alt gesprochen wort·
swa din herze wont da lit din hort·

ICh habe endelichen fvnden·
einen schoͤnen hort·
den kos ich mir zeinen stvnden·
nvst min herze dort·
bi dem horde der mir fuͤget pin·
dú vil reine·
wandels eine
mv̊s mir sin·
hort in dem vil senden herzen min·
Est ein alt gesprochen wort·
swa din herze wont da lit din hort·

Min hort kan wol tvgende horden·
vnd hohen mv̊t·
dú mir ist ze horde worden·
dest min frowe gv̊t·
in der guͤte loͤse wol gestalt·
ir gebaren
an den iaren
mich tv̊t alt·
swie ir tvgende doch si manigvalt·
Est ein alt gesprochen wort·
swa din herze wont da lit din hort·^{[WS 1]}

Maniger der hat hort verborgen·
des er troͤstet sich·
min hort get mir niht· wan sorgen·
vnd smehet mich·
min vil lieber hort ist mir also·
gar vnnútze·
minne schútze·
cupido·
traf min herze sit bin ich vnfro·
Est ein alt gesprochen wort·
swa din herze wont da lit din hort·^{[WS 2]}

Minne dv́ ist gewalteklichen·
allen dingen obe·
ir kan niht vf erde entwichen·
es gevahe ir klobe·
wisheit hort dv́ beide nigent ir
minne svͤsse
kvmber bvͤsse·
nach der gir·
twinge minen hort geliche mir·
Est ein alt gesprochen wort·
swa din herze wont da lit din hort·^{[WS 3]}

Anmerkungen (Wikisource)

1. Vorlage: Eſt ein·
2. Vorlage: Eſt ein alt ge·
3. Vorlage: Eſt ein alt geſpꝛochē wort·