Svmer der hat sin gezelt

Svmer der hat sin gezelt·
nv gerihtet vberal·
vf die ǒwe^{[WS 1]} vnd vf die sine weide·
wol gezieret stant dú velt·
man hoͤret kleiner vogelin schal·
schone singet lerche vber heide·
ich lobe dich meie diner kraft·
wc dv vns bringest svͤsser morgen towen·
dv tv̊st sumer sigehaft·
bi dem rine gruͤnent werde vnd ǒwen·
iarlang svln wir heiden ǒwen schǒwen·

Vil der brunen klingen treit·
die uerwertet hant den tanz·
fridebolt vnd al sin cvmpenien·
lengú swert zemâsse breit·
sleht zebeiden eggen ganz·
si went sich vor allen foͤgten vrien·
otte wilt dv dc oster spil·
so la mih nach dinem rate sinnen·
kúnze dú hat frúnde vil·
las an mich er sprach nv ste mit minnen·
fridebolt nv fuͤre den pris von hinnen·

Fridebolt setze vf den hůt·
wol gefrúnt vnd gang es vor·
bint dc ostersachs zer lengen siten·
bis dur kv́nzen hohgemv̊t·
leite vns vúr dc tinkvftor·
la den tanz al vf den wasen riten·
werdest vnderdrungen gar·
so la swertes knopf vf brvst erknellen·
slah die stahelbîssen dar·
dc die kolmerhuͤte vf koͤpfe erhellen·
dvr nieman la dir laster breit vf wellen·

Fro kúnze ia ist úwer trut·
vnder valken niht ein ar·
kvme ein lewen kla vnder andern tieren·
wie getorste er vberlut·
werden alde komen dar·
dc vns otte helfen wil rifieren·
da mv̊s er den treialtrei·
selbe zwelfte von der linden rumen·
lihte wirt im eins ald zwei·
wil sich einer in dem hanfe iht svmen·
der bedarf zer rehten hant des tvmen·

Swer selbe teilet vnd welt·
vnd witert swie er wil·
den sol der hagel slahen selten·
fro kúnze dast vf úch gezelt·
ir ruͤment fridebolten vil·
des mag elle vnd else wol engelten·
fridebolt si hin geleit·
otten ist von megden wol gesprochen·
elle dú die rise treit·
einest oder zwirent in der wochen·
otten wart sin tanz noch nie gebrochen·

Nie versvmde^{[WS 2]} noh vermeit·
fridebolt sin scharpfes ort·
er vergas nie swertes in der scheide·
swen sin langes sahs versneit·
der gesprach nie ach noh wort·
otte dc mag dir wol komen zeleide·
sich hebt ringen strúchel stos·
slah dc swert vf herten stahel dike·
iener vnd^{[WS 3]} dirre vnd des genos·
sere vdrússet mich ir wafen blike·
e dc ich vnder ǒch bas verbike·

Anmerkungen (Wikisource)

1. Vorlage: vf die.
2. Vorlage: v̾ſvnde.
3. Vorlage: vn̄.