Svmer svmer svmerzit

Svmer svmer svmerzit·
wc vns din kvnft froͤide git·
als dú heide in gruͤne lit·
dennoch so mac mich troͤsten bas·
ein wib der ich noch nie vergas·
wil dú so wirt min froͤide wit·
vnd also wit· swanne ich si mac sehen·
so ist mime herzen dem gelich·
also ist min frowe tvgende rich·
des helfent mir min ǒgen iehen·

Frowe frowe frowe min·
der dri der solt dv eine sin·
vnd aller tvgende ein keiserin·
dv bist dú dri vnd bist dú eine·
dv bist dv́ vierde die ich da meine·
dv bist gelich der svnnen schin·
wan ich bin· tvmp so ist sie vil wis·
das sol div werde mir vertragen·
dc ich ir lob sol hohe sagen·
si wol geblv̊tes meien ris·

Rose rose rosen blv̊t·
dv bist noch besser danne gv̊t·
dv bist vil lieb vnd wol gemv̊t·
dú bist min trost min zůversiht·
min heil min froͤide vnd anders niht·
din lip hat ganzer tvgende part·
mir enwart· so liebes nie niht kvnt·
eý frowe min ioch^{[WS 1]} meine ich dich·
dvr alle tvgende kússen mich·
mit^{[WS 2]} liehten ǒgen roter mvnt·

Anmerkungen (Wikisource)

1. Vorlage: ioh.
2. Vorlage: vil.