Swen liebi twinget· vnd nit nutz nach worte das er

Swen^{[WS 1]} liebi twinget· vnd nit nutz nach worte das er frúnt ist· der ist frúnt gar an vidrutz·
vnd mit getrúwem hertzen·
des frúntschaft wert nach frúndes tode gar·
Swer aber ein frúnt ist dur dv́ zwei
so der nicht mer ist· so ist ǒch dv́ frúntschaft gar entzwei·
sin hertze wil nicht smertzen·
dur frúnde han· da ist er trúwen bar·
swer einen frúnt getrúwes hertzen vinde·
dem trag er liebi me dann sinem kinde·
gůt frúnt lat frúndes nicht zenoͤten·
den lat ǒch got ze frúnde nicht·
so man in lan die valschen sicht
frúnt mit im lebt· vnfrúnde kan er toͤten·

Das^{[WS 2]} fule holtz man schinen sicht·
da man es vindet nachtes· es enluchtet aber nicht·
es ist ǒch kleiner swere·
vnd ist des tages kranker eren wert·
der valsche frúnt im gelich·
der frúnt ist mit den worten· vnd entseit mit den werken sich·
da wirt er lugenere·
sin wage da nit loͤtig silber wert·
der warheit tag· des valschen valscheit zeiget
so ere sich gerechtem frúnde neiget·
gůt frúnt verwigt den zentenere·
der valsch ein quinti nicht enwigt·
da wort nit werk· zewage ligt·
pfuch der gewicht ist gantzem frúnt vnmere·

Anmerkungen (Wikisource)

1. Vorlage: wen.
2. Vorlage: as.