Swer die wunne
[86v]
Swer die wunne· wol pruͤuen kv́ne· der si des gemant·
wan dú zit ist wunneklich gestalt·
Wan mag schǒwen· an velt an ǒwen· dc ist mir bekant·
die sint komen vs leide·
vogel singen· vil svͤsse erklingen· hoͤrt man vber al·
sit ir stimme dússet dvr den walt·
wie gar schone· in suͤssem done· schellet nahtegal·
vnd lerche vber heide·
Der anger lit· an allen strit· mit blv̊men wohl bespreit·
der meie dise varwe git·
Dú heide lachet· vnd machet· maniger hande kleit·
das ir trvren verswachet·
der bǒme blv̊t· dú ist so gv̊t· vnd ovch dc gruͤne gras·
das dien ǒgen sanfte tůt·
dem wit gevilde· rifen wilde· sint swie vil der was·
Vnd snewes vnbilde·
An disen stvnden· sint gar enbvnden·
vnden· vnd ǒch oben berg vnd ellú gruͤne tal·
Noch ist min sweren· gar súftebere·
were· dú zergangen seht so wolde ich singen·
Ich mv̊s in sorgen· vil mangen morgen·
worgen· sit ir munt mich niht entroͤstet vber al·
Des lide ich kvmber· ich sender tumber·
krumber· not mich niht mag senelicher twingen·
Von minne· sinne· mir zerrinen wil·
si hasset· lasset· mich gar ane zil·
Dú reine· meine· danne ein kleine· mich·
vnd stille· ir wille· wol bedehte sich·
So wurde ich fro· vnd keme es so· dc mir noch wurde ir trost·
seht so stuͤnde min gemvͤte ho·
Wil si mir swenden· sorge wenden· so wurde ich er lost·
vnd mvͤste min leit sich enden·
Si selig wib· der nv min lib· ist lieblich vndertan·
dv́ mag vil wol heissen leitv́trib·
Si reine frǒwe· in liehter schǒwe· sol mir froͤide lan·
si gelichet rosen in tǒwe·
Ich kroͤne schoͤne· frowe dich·
dv bist so minneklich·
Din ivgende· tvgende· nietent sich·
vnd bist ǒch froͤidenrich·
Mit eren· meren· kanst dv wol·
din lob mit wirde vol·
Vil svͤsse· buͤsse· sende dol·
sit ich dir dienen sol·
Ich kv́nde· sv́nde· die dv tůst an mir·
sit dc dv mich búnde· in selhe gir·
Ich schine· in pine· dc ist leider war·
vf die besten trúwe mine·
Nv geile· heile· mir die wnde min·
von der sorge meile· wolde ich sin·
Ich lide· nide· von dir svnderbar·
selig frowe die vermide·
Vnd gib mir rat· min herze hat· gedinge hin ze dir·
swie din gvͤte mich in sorgen lat·
Ich moͤhte ersterben· sol min werben· niht erschiessen mir·
vnd in leide verderben·
Es ist ein not· sol ich den tot· alsus vdienet han·
sit dv́ minne trvren mir gebot·
Dú minne stoͤret· vnd toͤret· mich an allen wan·
sit dc si mich niht enhoͤret·
Es ist ein wunder· sol ich bi svnder·
vnder· minen dank verderben seht dc mv̊s ich klagen·
ach frowe scheide· von senedem leide·
beide· mir den mv̊t vnd alle mine sinne·
Sit ich erschrike· so dine blike·
[87r] dike mir ein minnenkliches lachen went versagen·
Vnd ich gedenke· ach sender schenke·
wenke· niht an dienste so beiagest dv minne·
Durh ere· kere· noch von sere· mir
gemv̊te· gvͤte wiblich niht embir·
Vnd mache· lache· sorge swache· ahý·
min bvrde· wurde· lihter vil da bi·
Vil reine fruht· dvr dine zuht· la mich in froͤiden sin·
so hat ellú sorge von mir fluht·
Din mvnt nach roͤte· var von noͤte· neme dc herze min·
ê dv́ minne mich ertoͤte·
Nv sich dar zů· es niht ze frů· vil reine ein selig wib·
alder in weis niht wc ich sender tů·
ach got wie lange· selhe plange· hat min sender lip·
nv hilf dc dú zer gange·
Nement war· gar· dar· war· mir dc herze meine·
den mv̊t· wie kleine· min gv̊t· mich tv̊t· behv̊t·
sit ich liden· mv̊s also langes niden von ir·
Ir has· las· bas· dc· herze min vermeret·
da bi· vnd sweret· sam bli· swie vri· ich si
ir gemvͤte· hat niht gvete· gegen mir·
Nv ist min· sin· hin· in· senelichen dingen·
owe· sit bringen· mag kle· niht me· als ê·
selhe wunne· da von mir truren kvnne· zergan·
Min strit· git· nit· sit· dc ich nach ir minne
so ranc· vnd sinne· betwanc· ir danc· ist kranc·
al dar vnder· gegen mir svnder· wan·
minnenklichú reine· nv sich· vnd meine· dv mich· sit ich· An dich·
sinne kere· dv gib mir svͤsse lere· vnd rat·
Lat si mich in kumber· bestan· ich tvmber· mv̊s lan· den wan· ich han·
grôssen smerzen· den si in herzen· mir lat·
Ach ich tore· sit ir ore·
niht enpfahet· vnd versmahet minen sanc·
dú vil schoͤne· mine doͤne·
hoͤret kvme· ich versv̂me· manigen dank·
sit ir ǒgen· niht wen ǒgen·
mir ein smieren· vnd ein lieblich zwieren· da von·
Mv̊s ich erben· ein verderben·
in dem sinne ich bin minne· niht gewon·
Ich trage· die klage vil minneklich·
sit[WS 1] kleine· dv́ reine· mir froͤide git·
Gv̊t· mv̊t· túret mir· vnd herzen gir·
swer· der· niht enhat· dc gros vnrat·
Wie sol min herze· fro bestan·
sol mir der smerze· niht zergan·
vnd mir niemer froͤide gelan·
sol ich den kvmber iemer han·
so lebe ich gar· in sorgen schar·
Sol ich verderben· von der tat·
dc mich min werben· niht veruat·
git mir minne vil kleinen rat·
min mv̊t dar inne trurig stat·
vnd ist min leit· vn mâssen breit·
Ich bin ane· liebem wane·
minnen[WS 2] drúke· dast ein vngelúke· an mir·
Ich gedinge· dc si bringe·
mir noch wenne[WS 3]· trost erkenne· bas an ir·
Wie gezeme· dc si neme·
mich in hvlde· sit ich schulde· niene trage·
vnd si spreche· wc si reche·
dú vil klůge· dc si fůge mir versage·
Got wolde· solde· ir múndel rot·
Mich erlan herzeklicher not·
Minne· in sinne· mir gebot·
dc ich han kvmber vf den tot·
Frowe swache mir dv́ leit·
vnd mache mir froͤide breit·
von der sache wirt ich gemeit·
vnd wirt mir heil· so bin ich geil·
Gvnne wunne· mir dir zvht·
sost von mir ellú vngenvht·
lâsse· mâsse· reine fruht·
mir zv̊ dir hat min herze fluht·
Trut dv setze mich vs klage·
vnd ergetze· mich alle tage
vnd letze mir sorgen wage·
vnd kvmt es so ich [wir]de fro·
Schupfe gupfe· leit hin dan·
wise mich lise· vf minnen ban·
sit ich noch froͤide nie gewan·
so wirt min mv̊t· vn massen gv̊t·
Swinde· embinde· mir den strik·
loͤse· vnd oͤse den selben rik·
den mir tv̊t diner ǒgen blik·
do ich dich sach· do schrei ich ach·
Lebe an ende· sorge wende·
mit vil armen· wan erbarmen· zimt dir wol·
Da von leite· niht enbeite·
mich von swere· gerne ich were· froͤiden vol·
Swa quale· nimt twale[WS 4]· da wirt man gra·
nie· die pine min sendes herze verlie·
Tů sorgen froͤwe·[WS 5] mir noch bv̊s·
vil gerne ich schǒwe· dinen grůs·
vnz vf den fůs· dir nigen mv̊s·
vil selig wib· min sender lip·
Sit ich dich prise· frowe gv̊t·
von leide· wise· mir den mv̊t·
vor sorgen flůt· bin ich behv̊t·
vnd wirt mir schin· dú helfe din·
Gerne ich svnge me vnd brvnge[WS 6]·
dien die singent· vnd dringet[WS 7]· disen sanc·
durh ir ere·fúr min lere·
werdent hoͤne· dis gedoͤne· ist in ze lanc·
Ich gedinge· der ich singe·
dc si lerne[WS 8]· doch vil gerne· disen tanz·
[87v] Dú vil gv̊te· wol gemv̊te·
in ir ivgende· hat an tugende lobes kranz·
Wol vf ir kint sint· fro· so mv̊s· bv̊s· sorgen sin·
Truren var hin· sin· mv̊t· tůt· geil· heil· werden schin·
Wa ist nv v̊te· vnd gv̊t· vnd tv̊t· vns sorgen bar·
Iúte vnd hille· vnd wille· stille· koment dar·
Springent froͤlich an den tanz·
húre ist der svmer glanz·
da wirt dú froͤde ganz·
man siht da manigen kranz·
Frowen nv singent· vnd dringent· vnd springent·
húbsche tritte·
Rihtent ze minne· die sinne· dar inne· mit gůtem sitte·
Pfaffen leigen trettent an·
dien got der selden gan·
er ist[WS 9] gar ein selig man·
der mit dien lúten kan·
Vnder dien linden· bi húbschen kinden· sorgen mv̊s swinden·
lachen· machen· kunnen wunnen· wol dú kint·
Erent den meiien· singent den reijen· ir sult úch zwiien·
heze· meze· nese· gese· goͤtelin·
Ich wil hoͤren es ist zit·
Ich han der lúte nit·
Wan des reigen ist ze vil·
des ich erwinden wil·
Ir sint mvͤde dvnket mich·
es ist vngemenlich·
Schrient alle heia hei·
nv ist der seite enzwei·