Swer in leide si verswachet

Swer in leide si verswachet
der gedenk enzit·
was an wiben eren lit·
wissent das sin sêndes herze erlachet
wibes minne froͤide machet·
wibes er ist wit
wem ir gvͤti helfe git·
wissent das des hoch gemvͤte erwachet·
wissent das von wiben leit zerspringet·
wip sint hort da man nach eren ringet·

Swer ein wip mit trúwen minnet
der hat froͤiden vil·
ob dv́ minneklichv́ wip·
wissent das in herzeleit zerrinnet·
lieb im in sinen mv̊t besinnet·
sin froͤiden spil
swêndet in der sorgen vil·
vnd er nicht wan herzeliep gewinnet·
hilf mir svͤsse minneklichv́ minne·
das ich einer hulde noch gewinne·

Wenne sol ich froͤide vinden
ich bin vngesvnt·
truren hat mich dar verwunt·
das mich nieman recht kan verbinden·
wolt aber sich min vnder winden·
noch ir roter mvnt·
secht dv́ fv́nde wol den fvnt·
das min leit min sorgen muͤste swinden·
minne hilf dvrch willen gůter wiben·
das si mir noch sênde not ver tribe·