Swie dú zit ſich wil verkeren
[52v]
Swie dú zit ſich wil verkeren·
ſeren· mv̊s das ſende herze min·
wil min frowe mich niht eren·
meren· mv̊s min ſenelicher pin·
frowe ir tv̊nt mir helfe ſchī·
frowe ir ſvlt mich froͤide leren·
ald ich mv̊s verdoꝛben ſin·
Ach ich ſach ein gvͤtlich lachen·
machē· minneklich ein mv́ndel rot·
von dien minneklichen ſachen·
krachen· mv̊s das herze min von not·
minne iamer mir gebot·
dc min ſin begvnde ſwachen·
deſ bin ich an froͤiden tot·
FRowe min gebieterinne·
minne· hāt ir da bi reine ſitte·
hoͤhent frowe minē ſinne·
minne· ich úch des iemer bitte·
teilent mir die minne mitte·
der ich froͤide noch gewinne·
ach die minne ich ſanfte litte·
Frowe ir ſint ſo wol beſcheiden·
leiden· ſol iv gv̊tes frúndes leit·
froͤide dú iſt an vns beiden·
ſcheiden· ſvlt ir mich von arbeit·
al min froͤide iſt gvnterfeit·
welt ir frowe mich niht kleiden·
ſchiere in froͤiderichú kleit·
Der vil ſvͤſſen minne wunden·
fvndē· habe ich vf der froͤiden tot·
in kan niemer wol geſvnden·
kvnden mvͤſſe ir minnegerndv́ not·
troſte mich ir mv̊ndel rot·
ſo were al min leit v̾ſwnden·
ſwie ſi ſenen mir gebot·