Swie der walt nv stet in bluͤte

Swie der walt nv stet in bluͤte·
swie dú heide wol gezieret ste·
swie der vogel hohgemvͤte·
si gehoͤhet mir ist doch vil we·
ich mv̊s ane wer verderben·
in dien ganzen wunnen sterben·
mich enkan dú svmerzit·
niht von sender not gescheiden·
der vil lieben welle leiden·
das min herze in banden lit·

Wolde mich dú gv̊te enbinden·
dú min herze in Minne banden hat·
koͤnde ich die genade vinden·
so wurde aller miner swere rat·
swie si mich enzit enbvnde·
e min froͤide gar verswunde·
so wolde ich in wunnen sweben·
vnd ir reinen wibes gvͤte·
prisen wol mit hohgemvͤte·
der ich wil fúr eigen leben·

Swie gehas si mir dú gůte·
doch bin ich ir mit gedanken bi·
da vor kan si kleine hůte·
han swie vngenedeg si mir si·
wil si mich zefrúnde versmahen·
doch gedenke ich ir wol nahen·
wirt mir anders niht von ir·
so kan si mir niht entwenken·
in enwelle ir nahe denken·
das tv̊t ǒch vil sanfte mir·

Minne fuͤget húbschen liben·
liebes leben vnd da bi hohen mv̊t·
werden mannen gv̊ten wiben·
wart ze hohen froͤiden nie so gv̊t·
so dc si mit steten sinnen·
minneklich ein ander minnen·
dc ist ob allen froͤiden gar·
ich wene nieman besser wunne·
vinden alde erdenken kvnne·
es tůt aller sorgen bar·

Sit der wunnen niht gelichen·
kan gegen hohen eren selig wib·
so sult ir mich froͤiden richen·
liebú frǒwen vnd minnen minen lip·
sit úch meinet min gemvͤte·
minnent mich dvr úwer gvͤte·
alder ich bin an froͤiden tot·
sol mir niht an ir gelingen·
so kan nieman mir geringen·
mine seneclichen not·