Swie vil das mensche zv̊ der welt gůtes habe

Swie vil das mensche zv̊ der welt gůtes habe·
vnd es gedenket wie es scheiden mv̊s dar abe·
ze leste mit dem tode so mag es truren sere
da vor nint frúntt richtům geburt von hoher art·
wisheit gewalt· das mvͤsse an des todes vart·
es darf da fúr niht sůchen weder rat noch lere·
kein meister in nigromantia·
wart nie so wiser rete·
das er ie wurde des todes vri
noch heilig wis prophete·
dvr den grossen vn gewin·
ich dicke gar betruͤbet bin·
so nieman weis nv wa dv́ sele kvmer hin·
so der tot den lip er mant das er von leben kere·

Uil manger mv̊s bescheiden wesen dur die not·
der vmbe scheiden were wan das im gebot·
sin meisterschaft das er vnfůge muͤste lassen·
da bi so nenm ǒch meniger gernde den gesůch·
das liesse er nicht dur got noch dvr der lúten flůch·
wan das er hat des hǒbet gůtes al ze mâssen·
vnd das der esel hetti horn
die lúte er nider stiesse·
vermoͤchti kocheldrille sinen zorn
nieman es leben liesse·
stvͤnt an wolfen gar dv́ kv́r·
vil schâffen man dar an ver lv́r
diep wolti das beslossen wurde niemer tv́r·
derc boͤse wolti das der biderbe wer verwâssen·

Hatte richer mel der arme da bi eschen hât·
dar an gedenke ein wiser man das ist min rat·
vnd lach dir nit den armen sin ze smehe zeinem frúnde·
vil lichte kvmet dv́ stunde das er sin bedarf·
da von si richer gen dem armen nicht ze scharf·
kv̊ sunder hagen gen^{[WS 1]} svmer niht wol getůn kv́nne^{[WS 2]}·
wie man den esel hat vnwert·
doch was er ie gereite·
wa man ie sines dienstes gert·
das er in nie verseite·
hetti nieman zv̊ armůten pflicht·
der richen richtv̊n wer ein wicht·
wer solt dann dienen ob der arme were nicht·
gůt was ie das baste· das man den sak da mit verbunde·

Anmerkungen (Wikisource)

1. Vorlage: den.
2. Vorlage: kvnnen.