Trúwe ist al der werlte ein ere

Trúwe ist al der werlte ein ere·
wol im der si rehte treit·
si ist vf alle tvgent ein lere·
slos ob aller werdekeit·
swa ir stete bi gestat·
was bedarf er tvgenden mere·
swer die tvgende beide hat·

Das ieman die tugende scheide·
des wil rehte minne niht·
minne wil si halten beide·
si hat mit in stete pfliht·
dc si frvm oder vngewin·
es si lieb oder es si leit·
des enkvmt si niht von in·

Minne niender sich enthaldet·
ane trúwe vnd steten mv̊t·
swer dú niht ze samne valdet^{[WS 1]}·
als eht vil manig valscher tůt·
dan ist niender minne bi·
er vnfv̊get vnd gewaldet
swer giht dc da minne si·

Da bi kúse ich dc dú here·
der ich her gedienet han·
vnd gediene aber niemer mere·
trúwe an mir niht kan began·
hete si trúwe erzeiget mir·
dc wer wunder iemer mere·
sit niht trúwen lit an ir·

Minne hat mich ir gebunden·
vnd lie si banden vri·
des han ich mit schaden enpfvnden^{[WS 2]}
swer als ich in banden si·
der reite vs den banden sich·
ich han mich dem strike entwunden
al zespete· dc klage ich·

Anmerkungen (Wikisource)

1. Vorlage: waldet.
2. Vorlage: en enpfvnden.