Venvs dú feine dú iſt entſlafen
[384r]
VEnvs dú feine dú iſt entſlafen·
dú wilent hoher mīne wielt·
des ſchꝛîet manig frowe wafen·
dú vō ir helfe ſich enthielt·
dc man ir ſvͤſſe mīne ſchúhet·
vn̄ ir vil mīneklichē lip·
vn̄ aller froͤide ſich enzúhet·
dur der vil argē herrē[WS 1] kib·
Die lange ſint· an minne blint·
vn̄ in dien reiſen wol geſehent[WS 2]·
ſchúrf vn̄ ſchint· ſchaf vn̄ rint·
dc ſint die minne die ſi ſpehent·
Her mars der rihſet in dē lande·
der hat den w̾den got amvr·
v̾hert mit rǒbe vn̄ ǒch mit bꝛande·
des ſint die mīne woꝛdē ſvr·
die man hie voꝛ vil ſvͤſſe erkande·
do riualis vn̄ flantſchiflur·
vil kvmbers littē vō ir bande·
nv wil d̾ herre vn̄ der gebur·
Rǒb vn̄ bꝛant vil g̾ne vͤben·
dan er die ſvͤſſen mīne tuo·
Dc mv̊s dú reinē wib betruͤbē·
dú wol gebildet ſint dar zv̊·
das man vil g̾ner ſolte mīnē·
ir zuht ir ere ir w̾dekeit·
dan ein vil krankes gůt gewinnen·
ſin vberkraft [384v] iſt woꝛden bꝛeit·
Den ich hie voꝛ genennet han·
dc iſt d̾ leide ſtrites got·
d̾ froͤiden toꝛ iſt zů getan·
dur ſin gewalteklich gebot·
Der frowē tanz iſt hin geleit·
die ſchopen die ſint woꝛdē wert·
fúr einē kranz man gerne treit·
ein beggelhuben oder ein ſwert·
Jn dirre witen w̾lde kreiſſen·
hat irre ſamen vns geſat·
ein frowe iſt wendelmv̊t geheiſſen·
d̾ fruht birt mangen valſchen rat·
ſi kan den man dar vf wol reiſſen·
dc er vnbildes vil begat·
an armē kvͤien vn̄ an geiſſen·
vn̄ an dien lútē die man vat·
Gewalt iſt vf der ſtraſſe michel·
gerihtes hat man ſich v̾ſchamt·
dú reht ſtent krvmber dan ein ſichel·
fride vn̄ genade ſint erlamt·
des mv̊s der w̾lde mīne túren·
vn̄ aller froͤide ſin[WS 3] v̾zigē·
ſit mā den ſuͤſſen got amv́rē·
an w̾dekeit hat vber ſtigen·
Des ſtrites got· vnde ſin gebot·
vil ſere miſſehellē kan·
vil mangen man ir valſcher rat·
bis vf den tot v̾leitet hat[WS 4]·
Dc ſchein dar an· do troie bꝛā·
von der vil werde kúnic paris·
in kriegeſ wiſ v̾loꝛ den lip·
dc ſchv̊f diſcoꝛdia daſ wib·
Nv wera dich vil werd̾ fúrſte amvr·
ê dc man gar v̾dꝛvke dich·
Dv mache ir eteſlichen iamers ſvr·
d̾ vō der minne zúhet ſich·
ſit dc dú w̾lt ſo gar v̾zwiuelt iſt·
dc ſi dekeiner froͤide nimit war·
La ſchowē h̾re ob dv gewaltic biſt·
dv mache dc ſi ſtrites w̾den bar·
Vn̄ lip vf mīne ſezen·
dú vil hohgemvͤtes[WS 5] birt·
La dú wib ir leideſ ergetzen·
die an minnē ſint v̾irt·
ſchús den pfil vn̄ ǒch die ſtrale·
dú vil mangē hat v̾wunt·
verdꝛvke ir vil mit ſender kale·
ſo wirt in div mīne kvnt·
Swēne ſi ir ſtriten lânt·
vn̄ der[WS 6] kriege abegant·
vn̄ den frowen bi geſtant·
die vil ſvͤſſer mīne hant·
Jr riten·
ir ſtritē·
wirt in gar vnmere·
div mīne ir ſinne·
berǒbet vil der ſw̾e·
ir libē· an wiben·
mit froͤidē mv̊s gelingē·
ſi kvnnē· vil wūnen·
mit hohgemvͤte bꝛingē·
Venus vil w̾dú kúnigin·
wache ein frowe eſt an der zit·
din ſvn amvr der beitet din·
ir varent ſamēt in den ſtrit·
Wirf din fúr vn̄ ǒch din zvnder·
in ir h̾ze mit gewalt·
die mit kriege ſtiftent wunder·
mache ir lip an mīnen balt·
mit dien ſendē mīne ſtriken·
mache[WS 7] ir kvmber kvmberlich·
laſſe ir h̾ze in fúre erſtiken·
bis dc ſi v̾ſinnē ſich·
Das dú ſuͤſſe mīne git·
hohgemuͤte zaller zit·
vn̄ des froͤide machet wit·
d̾ bi h̾ze liebe lit·
So ſingent· vn̄ ſpꝛingent·
mit froͤiden ivnge vn̄ alte·
ir h̾zē vō ſmerzen·
ſi ſcheidet mit gewalte·
die krenze· die ſwenze·
w̾dent vil genême·
die iôpen· die ſchopē·
dien lúten wid̾ zeme·
Beide rǒp vn̄ bꝛant·
wirt geſtillet ſa zehant·
So dú mīne wirt bekant·
dú gewaltēs iſt gepfant·
Werden wib nv ſint getroͤſtet·
úwer ſoꝛge wirt wol rat·
dú mīne noch vil manigen roͤſtet·
der mit kriegē vmbe gat·
diſen tanz hat iv geſvngē·
kv̊nze da vō wúrzebvrc·
ir wúnſchent dc vō ſiner zvngen·
niemer rime gefliege lvrc·