Vnder der linden (Mit originalen Lettern)

VNder der linden·
an der heide·
da vnſer zweier bette was·
da mvgent ir vindē·
ſchone beide·
gebꝛochen blv̊men vn̄ graſ·
voꝛ dem waldē in einem tal·
tandaradai ſchone ſanc dú nahtegal·

Ich kan gegangē·
zv̊ der ǒwe·
do was min friedel komē· e·
da wart ich enpfangē·
here frowe·
dc ich bin ſelig iemer me·
er kvſte mich wol tvſent ſtvnt·
tandaradei ſeht wie rot mir iſt der mvnt·

Do hat er gemachet·
alſo riche·
von blv̊mē ein bette ſtat·
des wirt noch gelachet innekliche·
kvmt iemē an dc ſelbe pfat·
bi den roſen er wol mac·
tandaradei merkē wa mirs hǒbet lac·

Das er bi mir lege·
weſſes iemen·
nvn welle got ſo ſchamt ich mich·
wes er mit mir pflege·
niem̾ niemen·
bevīde dc wā er vn̄ ich·
vn̄ ein kleineſ vogellin·
tandaradei dc mac wol getrúwe ſin·