Von der elbe wirt entſehen vil manig man

Von der elbe wirt entſehen vil manig man
alſo wart ich vō groſſer liebe entſehen·
vō der beſtē die ie dehein man lieb gewan·
Wil aber ſi mich dar vmbe vehen·
mir ze vnſtattē ſten·
mac ſi danne rechē ſich·
tv̊ des ich ſi bitte da mitte froͤwet ſi ſo mich·
dc ich danne voꝛ libe mv̊s zergen·

Swenne ir liehtē ǒgen alſo v̾kerent ſich·
dc ſi mich an dvr min h̾ze ſen·
ſw̾ da entzwiſchē danne ſtet vn̄ irret mich·
dem mvͤſſe al ſin froͤide zergen·
wā ich danne ſtan
vn̄ warte der frǒwen min·
rehte als des tages dú kleinē vogellin·
wēne ſol mir iemer lieb geſchen·

Mich entzúndet ir vil liehter ǒgen ſchin·
als dc fúr ein túrre zvnder tv̊t·
vn̄ ir froͤmde krenket ſo dc herze min·
als dc waſſer eine glv̊t·
vn̄ ir hoh̾ mv̊t·
vn̄ ir ſchoͤne vn̄ ir edelkeit·
vn̄ daſ wunder dc man vō ir tvgende ſeit·
daſ iſt mir vil úbel vn̄ ǒch lihte gv̊t·

Si gebútet vn̄ iſt in dem h̾zen min·
frǒwe vn̄ herer danne ich ſelbe ſi·
hei wā ſolt ich ir noch ſo gevangen ſin·
dc ſi mir mit trúwen were bi·
ganzer tage dꝛi·
vn̄ eteſliche naht·
ſon verlur ich niht dē lip vn̄ al die maht·
nv iſt ſi leider voꝛ mir al zefri·